қаладағы Абай атындағы
театрда салтанатты түрде аталып өтті
Тәуелсіздік күні қарсаңында облыс әкімінің орынбасары Нұрымбет Сақтағанов пен қала әкімі Айбек Кәрімов семейліктерді еркіндік, теңдік күнімен салтанатты түрде құттықтады. Сонымен қатар, қала басшысы елімізге еңбегі сіңген қос азаматқа «Семей қаласының құрметті азаматы» атағын табыстады.
Әйгерім Сәрсенғали,
«Семей таңы»
Салтанатты жиын өткен Абай атындағы театр залында ине шаншар орын болмады. Қала ақсақалдарынан бастап, білім беру және денсаулық сақтау қызметінің мамандары, мәслихат депутаттары, ауған соғысының ардагерлері және басқа да азаматтар осы жиыннан табылды.
Шығыс Қазақстан облысы әкімі атынан облыс әкімінің орынбасары Нұрымбет Сақтағанов жиылған жұртты Тәуелсіздік күнімен құттықтап:
— Ең үлкен құндылық – тәуелсіздік. Осыдан 22 жыл бұрын әлем картасында Тәуелсіз мемлекет пайда болды. Осы уақыт ішінде Елбасы Нұрсұлтан Назарбаевтың сарабдал саясатының арқасында еліміз үлкен жолды жүріп өтті. Дағдарыс кезеңдерінде де еліміз жақсы нәтиже көрсетті. Биылғы жылы облысымыздың әлеуметтік-экономикалық даму көрсеткіштері өткен жылдармен салыстырғанда әлдеқайда жақсы нәтиже беруде. Кейбір саладағы облыс дамуы мемлекеттік көрсеткіштен де жоғары. Мұның барлығы сіздердің еңбектеріңіздің нәтижесі. Көптеген ұлттар мен ұлыстардың татулықпен жұмыла жұмыс жасауының арқасында, — дей келе, Тәуел-сіздігіміздің тұғырлы болуын тіледі. Ақ тілекті жалғастырған қала әкімі Айбек Кәрімов:
— Тәуелсіздік ұғымы әр халық үшін қастерлі. Тәуелсіздікпен бірге Қазақстан мемлекетінің жаңа дәуірі басталды. Еркіндік еліміздің ұлттық құндылықтарына бет бұруға және оны қайта жаңғыртуға жол ашты. Ұлттық дүниетанымға деген еркін көзқарас пайда болды. Қазақстан халықтарының ынтымағын жаңа белеске көтерді. Халқымыздың ұлт көшбасшысына деген сенімі жеңіп шықты. Түбегейлі демократиялық-құқықтық мемлекет қалыптасты. Тәуелсіздік тіліміз бен дінімізді қа-лыпқа келтірді. Ұлттық сана-сезім қалыптасты. Демократиялық ұстанымдар орнықты, ұлттық және мәдени бірлік нысанаға алынды. Ата-бабаларымыздың аңсаған армандары орындалды. Оған қолжеткізу қаншалықты қиын болса, сол егемендікті сақтап қалу оңай еместігі белгілі. Біздің халқымыз Елбасына сене білді, соңынан ере білді. Нұрсұлтан Әбішұлының әр қадамы қазақ елінің Тәуелсіздігі мен мемлекет мәртебесін биіктете түсті,- деген қала басшысы еркіндік алған күннен бастап бүгінгі күнге дейін Қазақстан мемлекетінің серпінді дамуын тілге тиек ете отырып, сол жетістіктердің көш басында Елбасымыздың тұрғандығын атап өтті. Үстіміздегі жыл Семей өңірі үшін де табысты болғандығын айтқан А.Кәрімов сөз соңында: – Өз сөзімді Елбасымыздың «Мен біздің болашақ ұрпақтарымыз өзінің мәдениеті мен дәстүрін сақтаған, азат, үлкен мүмкіндікке ие Қазақстанда туғанын қалаймын!» деген тілегімен аяқтағым келеді. Тәуелсіздіктің тұғырын нығайта түсіп, ғұмырын баянды етудің арман-мақсаты осы сөздің аясына сыйып кеткендей. Баршаңыз- ға бақытты ғұмыр, береке-бірлік тілеймін. Еліміздегі бейбітшілік пен келісім нығая түссін! – деді.
Сондай-ақ, қаламыздың көркеюі мен экономикасына үлес қосқан азаматтарға табысталатын «Семей қаласының құрметті азаматы» атағы қала әкімінің ұсынысы, қалалық мәслихаттың шешімімен қаламызда біршама жыл еңбек еткен, Қазақстан мемлекетінің Қарулы күштерінің дамуына үлес қосқан даңқты батырымыз, «Халық қаһарманы» құрмет атағының, «Отан», «Қызыл жұлдыз», ІІ дәрежелі «Даңқ» ордендерінің иегері, ҚР Парламенті Мәжілісінің депутаты, генерал-лейтенант Бақытжан Ертаев пен қаланың дамуына сүбелі үлес қосқан «Құрмет белгісі», «Қызыл ту» ордендерінің иегері, еңбек ардагері Мәркен Шайжүнісовке табыстады.
Салтанатты жиын мерекелік концертпен жалғасын тапты.
