Апта басында Абай облысының әкімі Нұрлан Ұранхаев қазақтың рухани-мәдени астанасындағы Абай кітапханасы, тарихиөлкетану мұражайы, қалалық мәдениет сарайы, Әміре Қашаубаев атындағы мемлекеттік филармония сынды мәдени ошақтарды аралап, мекемелердің жұмысымен танысты.
Дана ТАЛҒАТБЕК, «Семей таңы»
Облыс басшысы, ең алдымен, еліміздегі көне кітапханалардың бірі Абай атындағы облыстық әмбебап кітапханаға барды. Мекеме қызметкерлері 1883 жылы, XIX ғасырдың екінші жартысында ашылған мекеменің бай тарихы жайлы әңгімеледі. 1992 жылы Қазақстан Республикасы Министрлер кабинетінің шешімімен кітапханаға оның алғашқы оқырмандарының бірі болған қазақтың ұлы ақыны Абайдың есімі берілді. Мәдениет ошағында ХVІІ ғасырдың екінші жартысынан ХХ ғасырдың басына дейін жарияланған 4500-ге жуық өте құнды, сирек кездесетін баспа материалдары сақталған. Кітапхананың сирек басылымдар қоры да өте бай, онда өңір тарихымен байланысты әдебиеттер, Императорлық Орыс географиялық қоғамының Батыс-Сібір бөлімі Семей бөлімшесінің ғылыми жарияланымдары, қазақ зиялыларының көзі тірісінде жарық көрген кітаптары, кеңес дәуіріндегі мерзімді басылымдар бар. Нұрлан Тельманұлы сондай-ақ кітапхана базасында жұмыс істейтін «Отбасы орталығы» қоғамдық қорының жұмысымен де танысты. Аталған қоғамдық қордың басшысы Жанна Жибраева орталықта мұқтаж жандарға материалдық көмек беріліп, психологиялық қызметтер көрсетілетінін айтты. Қоғамдық қор айына шамамен 40-50 отбасыны азық-түлікпен қамтамасыз етеді. Келесі кезекте аймақ басшысы Семей өңірінің даму тарихын толық көрсететін облыстық тарихи-өлкетану мұражайына барды. Мұражай тарихымен таныстырған мекеме басшысы Қайрат Сабырбаев музейдің өзі 1883 жылы саяси жер аударылған азаматтардың бастамасымен ұйымдастырылғанын, сондай-ақ мұражай қызметіне ұлы ақын Абай, философ әрі ойшыл Шәкәрім және заңғар жазушы Мұхтар Әуезов әр жылдары өз үлестерін қосқанын атап өтті. Бүгінде мұражай қорында 107 мыңнан астам жәдігер бар. Музей директоры экспонаттарды қалпына келтіруге, мұражайды кеңейтуге, сондай-ақ кадрдың жетіспеушілігіне қатысты бірқатар түйткілді мәселелерді де атап өтті. — Музейде тиісті жұмыстар атқарылуда. Бірақ біз өзімізді толғандырған мәселелерді де айтқымыз келеді. Мәселен, мұражайдың төбесінен су ағып жатыр, осы орайда, біз шатырды қалпына келтіруге өтініш бердік. Ғимарат соншалықты үлкен емес, сондықтан, өкінішке қарай, қолда бар жәдігерлерді орналастыра алмаймыз, — деген мекеме басшысы мұражай аумағында тағы бір нысан салынса деген өтінішін жеткізді. Облыс әкімі аталған мәселелерді бақылауға алатынын атап өтіп, келесі жылы мұражайдың шатырын жөндеуге қаражат бөлінетінін айтты. Аймақ басшысы жұмыс сапары барысында шаһар өмірінде ерекше орын алатын қалалық Мәдениет сарайына да барды. Ондағы ақындар орталығын, мұражайды және осында орналасқан үйірме, өнер, спорт залдарын аралап көріп, жұмысымен танысты. — Мәдениет сарайында концерттер мен мерекелік шаралар үнемі өткізіліп тұрады. 2017 жылы мекеме ғимаратының шатыры жөнделді. Балалар біздегі әр түрлі үйірмелерге қатыса алады. Мәдениет сарайы базасында әскери даңқ залы орналасқан, онда соғыс кезіндегі сарбаздарымыздың ерліктерін баяндайтын экспонаттар бар. Біз өскелең ұрпаққа патриоттық тәрбие беру ісіне де өз үлесімізді қосып келеміз, — дейді қызметкерлер. Сонымен қатар мұнда да шешілуі тиіс мәселелердің бар екені айтылды. Қызметкерлердің айтуынша, мекеме жылуға жарымай келеді. Берілетін жылу энергиясының сапасыздығынан көрермендер қыс мезгілінде концерттік шараларды сырт киіммен тамашалауға мәжбүр. Облыс әкімі бұл мәселенің шешімін қарастыратынын жеткізді. Осыдан соң аймақ басшысы Әміре Қашаубаев атындағы мемлекеттік филармонияға ат басын бұрды. Филармония ғимараты жаңғыртуды талап етеді, сахнаны үлкейту қажет, сондайақ мұнда да жылумен қамтуда мәселе бар. Нұрлан Тельманұлы бұрын кинотеатр орналасқан бұл ғимарат өнер мекемесінің талаптарына сай келмейтінін, сондықтан жаңа нысан қарастыру керектігін айтты. Филармония 1945 жылдың қазан айында Жамбыл атындағы қазақ мемлекеттік филармония жанындағы Семей концерттікэстрадалық бюросы ретінде ашылған. 1969 жылдың 29 шілдесінде Қазақ КСР Министрлер Кеңесінің қаулысымен филармонияға әнші Әміре Қашаубаевтың есімі берілді. Қазіргі уақытта филармонияда 180-ге жуық қызметкер жұмыс істейді. Кездесуді қорытындылай келе, Абай облысының әкімі айтылған мәселелердің барлығының шешімін табуға болатынын атап өтті. — Біздің Семей әрқашан мәдени орталық болған, менің ойымша, қазір де солай. Біз аралап шыққан мәдени орындардағы мәселелердің шешімі табылады, олар техникалық тұрғыдан жарақтандыруды да қажет етеді. Ең бастысы, бізде осындай мәдени орындарда жұмыс істей алатын адами капитал бар: бұл — біздің әртістер мен тұрғындар. Мен бұған дейін де осы салада кадрлар даярлайтын Мұқан Төлебаев атындағы училищеге қатысты сұрақтар қойғанмын. Роза Рымбаева сол оқу орнын бітірген, бүгінде ол — халық әртісі. Яғни, осындай дәрежеде кадрлар даярлай алатынымыз сөзсіз. Ал мәдениетті жаңғырту мәселесіне келетін болсақ, қазір тарихимәдени мұраны сақтау бойынша жұмыс тобы құрылуда. Бұл облыс әкімі жанындағы кейбір мәселелерді пысықтайтын топ болады, — деп түйіндеді сөзін Нұрлан Ұранхаев.
