Semeytany.kz — Абай облысында тауарды бағасы көрсетілмей сатқан бірқатар кәсіпкерлер әкімшілік жауапкершілікке тартылды. Өңірдің сауда және тұтынушылардың құқықтарын қорғау департаментіне жыл басынан бері баға жапсырмаларының болмауына қатысты 17 өтініш түскен.
Департамент мамандары жүргізген жоспардан тыс тексерулердің нәтижесінде 16 кәсіпкерлік субъектісінде сауда нысандарының ішкі және сыртқы витриналарында бағасы теңгемен көрсетілген баға белгілерінің болмағаны анықталды. Сондай-ақ кейбір нысандарда тауарды сақтау шарттары да талапқа сай еместігі белгілі болды. Анықталған заңбұзушылықтар үшін кәсіпкерлерге Әкімшілік құқық бұзушылық туралы кодекске сәйкес айыппұл салынды.
Ал бір өтініш бойынша заңбұзушылық дерегі расталмады. Осыған байланысты жоспардан тыс тексеру бұзушылықсыз жабылған.
Қазақстан Республикасының «Тұтынушылардың құқықтарын қорғау туралы» Заңының 24-бабының 12-тармағында сатушы (дайындаушы) тауардың құнын теңгемен көрсетуге міндетті екені нақты жазылған. Баға тауарға жапсырылған заттаңбада көрсетіліп, сауда объектісінің ішкі және сыртқы витриналарына қойылуы тиіс. Сонымен қатар сатушы мен дайындаушы тауарды сақтау жағдайларын қамтамасыз етуге, ал дайындаушы жұмыстар мен көрсетілетін қызметтердің құнын теңгемен жазбаша түрде көрсетуге міндетті.
Заңға сәйкес, дайындаушы тауардың жарамдылық мерзімін және сақтау мерзімін белгілеуге тиіс. Бағасы заттаңбамен рәсімделіп, витринада көрсетілген тауар сол құны бойынша сатылуы қажет. Яғни сатушы (дайындаушы) тауарды көрсетілген бағамен сатуға міндетті, ал тұтынушы сол баға бойынша сатып алуға құқылы.
Осы талаптарды бұзғаны үшін Қазақстан Республикасы Әкімшілік құқық бұзушылық туралы кодексінің 193-бабының 4-тармағында әкімшілік жауапкершілік көзделген. Аталған бапқа сәйкес:
-
шағын кәсіпкерлік субъектілері үшін – 6 айлық есептік көрсеткіш,
-
орта кәсіпкерлік субъектілері үшін – 10 айлық есептік көрсеткіш,
-
ірі кәсіпкерлік субъектілері үшін – 30 айлық есептік көрсеткіш мөлшерінде айыппұл салынады.
Департамент кәсіпкерлерге баға жапсырмаларын теңгемен дұрыс рәсімдеу, тауарды сақтау талаптарын қатаң сақтау – тұтынушылардың құқықтарын қорғаудың және бизнес пен сатып алушы арасындағы сенімді нығайтудың маңызды бөлігі екенін еске салады. Тұтынушыларға да өз құқықтарын білу, күмәнді жағдайларда уәкілетті органға жүгінуден тартынбау ұсынылады.
