МАҒРИПА ӘЖЕ
Ағыбаева Мағрипа Шалағанқызы 1919 жылы Абай ауданы Шыңғыстау тауының бөктерінде туылған. Бала кезінде әкесі кәмпескелеудің құрығына ілігіп, Ресейге жер аударылған. Ал, анасы балаларымен бірге Семейге қоныс аударған. Қаладағы тұрмыстары түзеліп, шаңырақтарының түтіні түзу ұша бастаған тұста Ұлы Отан соғысы басталып, үш ағасы бірдей майданға аттанғанда, Мағрипа апа тылда ел қатарлы тынымсыз еңбек етеді.
Мағрипа Шалағанқызы Абай ауданының азаматы Тәмен Ағыбайұлына тұрмысқа шығады. Жарасқан жұп 13 балаға әлемнің жарығын сыйлап, бүгінде 9 баласы Ағыбай әулеті ұрпағын жалғастырып отыр.
Тәмен Ағыбайұлы оқыған, көзі ашық, көкірегі ояу азамат. Соғыс жылдарында Архат ауылындағы мектепте бала оқыту ісімен айналысқан. Кейіннен Қасқабұлақ ауылында сауда саласында да жемісті еңбек еткен. 1973 жылы отағасы Тәмен өмірден озып, Мағрипа апа тоғыз баланы бір өзі тәрбиелеп осы күнге жеткізген бақытты кейуана.
— Маған өте қиын болды. Қосағым дүниеден озған соң, шаңырақты шайқалтпай ұстап отыру менің еншімде еді. Алдыма жалғыз мақсат – балаларымды қанаттыға қақтырмай, тұмсықтыға шоқтырмай өсіруді қойдым»,- дейді кейуана өткен күнді еске алып.
{jcomments on}Иә, мақсат жолында Мағрипа ана балалары үшін жұмыстың ауырлығына қарамастан еңбек етті. Олардың барлығын да қатарларынан қалдырмай оқытты. Әкенің жоқтығын сездірмеуге тырысты. Ұрпағына берген тәлімді тәрбиесінің жемісі болар, ананың еңбегі мен маңдай тері еш кеткен жоқ. Алғашқысы аяғынан тік тұрып, соңынан ерген бауырына қарайласты. Татулықтың, бірлік пен берекенің арқасында барлығы да ел қатарына қосылды. Бүгінде тоғызы еліміздің түпкір-түпкірінде қызмет етуде. 5 ұл мен 4 қыз өз алдына отау құрып, Мағрипа анаға 25 немере, 18 шөбере сыйлап отыр. Немерелерінің дені білім көкжиегіне иек артқандар. АҚШ, Корея сынды шет елдерде білім алып, еліміздің атағын асқақтатуға өз үлестерін қосуда.
Жиырма алты жылдан бері ененің тәлім-тәрбиесін алып келе жатқан қолындағы келіні Баян Советқазықызы Мағрипа апа жайлы өз ойын былай жеткізді:
— Анамыз жастайымыздан бауырына басып, жақсы қасиеттерге үйретті. «Өтірікпен дос болмаңдар, жалқаулық пен енжарлық — адамзат баласының ең үлкен жауы» деп үнемі санамызға құйып отырады. Мінезі бірбеткей болатын. Бір айтқанды екінші рет қайталамайтын. Бәрін қас – қабағынан ұғатынбыз. Он саусағынан өнер тамған жан,- деп сырымен бөлісті.
Ал, ұлы Әлімхан Тәменұлы ана бойындағы қайсарлық – ұлт келбетін танытады. Қазақ халқы қайсар десе, ең алдымен анамның болмысы мысал деген өз ұстанымын жеткізді. Әжей болса, бұл күнге жеткендігі үшін ең алдымен Алланың қолдауы, екіншіден өсіп – өнген ұрпағының тілеуі деп біледі.
Кезінде «Екпінді» газетімен сырлас болған Мағрипа Ағыбаева өзінің қаладан арнайы алғызып, басылым беттерін парақтайтынын айтып, сол кездердегі естеліктерін есіне алды. Сөз соңында «Семей таңы» газетінің 95 жылдық мерейтойымен құттықтап, бұйыртып жатса, ғасырлық тойды бірге атап өтейік деп, аналық ақ батасын да берді. Біз де өз кезегінде кейуананың отбасына амандық, деніне саулық тіледік.
