Өткен аптада Семей қаласы әкімінің міндетін атқарушы Димитрий Гариков сол жағалаудың, атап айтқанда Жаңақұрылыс, Мұхит, 8-шақырым, Кірпіш, Жоламан, Суық бұлақ мөлтек аудандары тұрғындарының алдында есеп берді. Кездесуге әкімдіктің дербес бөлімі басшылары, қалалық мәслихат депутаттары және коммуналдық кәсіпорын басшылары қатысты. Жиында Димитрий Гариков қалада атқарылған жұмыстар туралы баяндап, алдағы жоспарлармен таныстырды. Бүгінгі күннің ең өзекті мәселелерінің бірі – халықты таза ауыз сумен қамту. Қала әкімнің міндетін атқарушы Димитрий Гариков осы бағытта жүргізіліп жатқан жұмыстар жайлы айтып өтті. Қазіргі күні қалада таза ауыз сумен қамтамасыз ету жұмыстары жалғасуда. Жаңақұрылыс, Мұхит, 8-шақырым, Кірпіш, Жоламан, Суық бұлақ мөлтек аудандарында 18 мыңнан астам тұтынушыға қызмет көрсетіледі. 2020 жылы Молдағалиев, Первомайская, Пищевиков, Победа көшелеріндегі жалпы ұзындығы 4 шақырым болатын су құбыры желілеріне 538,9 млн теңгеден астам қаржыға қайта жаңғырту жұмыстары жүргізілді. Ал өткен жылы 912,2 млн теңге қаржыға Суық бұлақ кентінің су құбыры желілері қайта жаңартылып, кеңейтілді. Ұзындығы 24 шақырым болатын су құбыры желілері 508 үйге тартылды, — деді. Ал жылумен қамту мәселесіне тоқталсақ, бүгінгі күні меморандум аясында Әуезов даңғылында орналасқан 98, 100, 102, 104, 106, 108 тұрғын үйлерге жылу желісін салуға жоба әзірленген. Жобаның құны 124,0 млн теңгеге бағаланыпты. Сонымен қатар Мелькомбинат көшесіндегі тұрғын үйлердің жылу желілерін жөндеуге конкурстық рәсімдер жүргізу жоспарланған. Шаһарда абаттандыру жұмыстары да жалғасуда. Келер жылы 130,1 млн теңге қаржыға Ертіс көшесіндегі 14, Затаевич көшесіндегі 33, 33А, 35, Бөгенбайұлы көшесіндегі 44, 46, Безымянная көшесіндегі 2, 4, Қостанай көшесіндегі 75, 77, Островский көшесіндегі 5А, 5Б, 410-кварталдағы 3 — 13 аула аумақтарында абаттандыру жұмыстары жүргізілмек. Сондай-ақ Ертіс көшесіндегі 11, Әуезов көшесіндегі 37 үйлердің аулаларында балалар және спорт алаңдарын орнату жоспарланған. Кездесу барысында қала әкімінің міндетін атқарушы тұрғындар тарапынан түскен сауалдар мен шағымдарына жауап берді. Тұрғындардың шаһарда жүргізіліп жатқан кейбір жұмыстардың сапасына көңілдері толмайды, дәріханалар мен емхананың жоқтығына да наразы. Сондай-ақ қала көркін бұзып тұрған тұрғын үйлер, қоқыс шығару мәселесі де қозғалды. Сонымен бірге кездесуге қатысушылар ерте көктемде тоқтатылған ыстық судың қайта берілуін талап етті. Тұрғындардың өтініш-тілегін тыңдаған соң Димитрий Гариков көтерілген мәселелерді назарына алғанын, алдағы уақытта шешу жолдары қарастырылатынын айтты.
Арайлым ҚАЖИАҚПАРОВА,
«Семей таңы»
