Нұрдәулет КӘКІШЕВ,
«Семей таңы»
22 желтоқсан күні Әміре Қашау—баев атындағы Семей мемлекеттік филармониясының ұжымы Қытай Халық Республикасына гастрольдік сапарға аттанбақ. Соған орай Тәуел— сіздік күні мерекесі қарсаңында қалалық мәдениет үйінде аталмыш өнер ұжымы мүшелерінің қатысуымен баспасөз мәслихаты өтті.
Қазақтың дүлдүл әншісі Әміре Қашаубаевтың 125 жылдық мерейтойына арнал-ған «Әміренің ауылы» сияқты және басқа да концерттік бағдарламалары бойынша еліміздің әр аймағын аралап, әр өңірдің жұртшылығын өнерлерімен сусындатып жүрген филармония ұжымы Қытай елінің Үрімші, Санжы, Құтыби, Жеменей деген қалаларына барып, «Ертістің еркелері» атты концерттік бағдарламаларын ұсынбақ. Бұл гастрольдік сапардың мақсаты Елбасының «Қазақстан-2050» стратегиясы: қалыптасқан мемлекеттің жаңа саяси бағыты» атты биылғы Жолдауында көрсетілгендей, екі елдің мәдени және достық байланысын нығайтып, әрі қазақ елінің өнерін шетелдерде дәріптеу екенін айтқан ҚР Мәдениет қайраткері, Әміре Қашаубаев атындағы Семей мемлекеттік филармо-ниясының директоры Адай Азаматов:
— Шығыс Қазақстан облысының әкімі Бердібек Сапарбаевтың тікелей қолдауымен гастрольдік сапарға шет елге аттан-ғалы отырмыз. Жол шығынымызға облыстық бюджеттен де қаржы аударылды. Енді жоспарға сәйкес, Қытай Халық Республикасындағы сапарымыз бір жұмаға жалғасады , — деп аймақ басшысының атына алғысын айтты.
ҚР Мәдениет саласының үздігі Гүлдана Ноғайбаеваның орындауындағы «Жорғатай» халық әнімен басталатын концерттік бағдарламада жұлдызды жұп Қадылбек пен Маржан Омаровтар және ҚР Мәдениет қайраткері Мапруза Өтеуленова сынды күміс көмей әншілер мен жас биші Айнұр Асқар көрші елдің сахнасында өнер көрсетіп, концерт Ескендір Хасанғалиевтің «Айналдым елім» әнімен аяқталмақ. Баспасөз мәслихаты барысында өнер майталмандары жолға аттанар алдындағы соңғы дайындықтарын пысықтап өтті. Өнер ұжымының мүшелері жолға шығуға тас түйін дайын екенін айтады. Таланттарымен талайды тәнті етіп жүрген Әміре Қашау-баев атындағы Семей мемлекеттік филармония ұжымына сәт сапар тілейміз.
