Назарбаев Зияткерлік мектебінде өтті
Мерекелік көңіл күй Семей қаласының физика—математикалық бағыттағы Назарбаев Зияткерлік мектебінде жалғасын тапты.
Әйгерім Сәрсенғали,
«Семей таңы»
Тәуелсіздік күніне орай ұйымдастырылған «Елімнің бақытын тербеткен тәуелсіздік» атты мерекелік кештің мақсаты тарихтан сыр шертіп, жас ұрпақтың бойында отансүйгіштік қасиетін қалыптас-тыра отырып, Тәуелсіздіктің қасиетін түсінуге баулу болатын. Жиынға ата-аналар мен ұстаздар, оқушылар қатысты.
Оқушыларға Тәуелсіздіктің қастерлі ұғым екенін айтқан мектеп директорының міндетін атқарушы Бағдан Қайыржанов:
— Біз бірлігі жарасқан елміз. Асылын ардақтай білетін халқымыз Тәуелсіздіктің қадірін бағалай біледі. Елбасымыз «Біз бір ұлтпыз. Қанымыз бір, жанымыз бір» деп ерекше атап өткен болатын. Елдің арманы орындалып, толағай табыстарға жеткеніміз қазақ халқының адал перзенті, Ұлт Көшбасшысы Нұрсұлтан Назарбаевтың есімімен, сарабдал саясатымен тығыз байланысты. Бірлігіміздің арқасында еліміздің аты төрткүл әлемге танылып, көк байрағы желбіреп тұр. Тәуелсіздігіміздің арқасында жоғалғанымызды тауып, үзілгенді жалғап, рухани байлығымызды түгендедік. Егемендік оңай жолмен келген жоқ. Сол Тәуелсіздігімізді тұғырлы ететін – жастар, сіздер,- деген ол кешке жиылған жұртты мерекелерімен құттықтап, жылы лебізін білдірді. Тәуелсіздік тұғырын нығайту жолында оқушыларының аянбай еңбектенетінін атап өтіп, зор сенім білдірді. Құттықтау сөзден кейін Тәуелсіздік күніне орай адал еңбектері үшін ұстаздар мен шаруашылық қызметкерлеріне Алғыс хаттар табысталды.
Оқушылар патриоттық әндерді шыр- қап, жиылған жұрттың рухын көтерді. Мың бұралған биші қыздар өнердің тамаша үлгісін көрсетсе, ұстаздар мен оқушылар ел тарихынан сыр шерткен көрініс көрсетті. Бала Нұрсұлтанның дүниеге келуі және Қилы заман атты қарияға Тәуелсіз ел атты жасөспірімнің жолығуы, қарияның: «Ата бабаларың аңсаған тәуелсіздік ұрпағы екенсің. Қазақ халқы басынан талай-талай сын сағаттарды өткерді. Қай уақытта болмасын қазақ халқы елі мен жері үшін күресті. Қазақтың аспаны қандай кең болса, ақылы да сондай кең. Қазақтың жері қандай кең болса, пейілі де сондай кең…» деген сөздері қазақтың тарихи болмысын аңғартатындай.
Елбасымыз айтқандай, ертең ел тұтқасын ұстайтын азаматтар бүгінгі мектеп партасында отырғанын ескерсек, ұлттық болмысымызды бала бойына сіңіріп, отансүйгіштікке баулу – басты міндет. Жүрегі «қазақ» деп соққан ұландар Қазақ атын аспандатары сөзсіз. Бұл жолда тәрбие мен білім ошағы-мектептің арқалар жүгі көп.
