АСТАНА АТАУЫ ҚАЙТАРЫЛДЫ
17 қыркүйек күні Мемлекет басшысы Қасым-Жомарт Тоқаев «Қазақстан Республикасының Конституциясына өзгерістер мен толықтыру енгізу туралы» Қазақстан Республикасының Заңына қол қойды.
Айта кетсек, бұған дейін Парламент палаталарының бірлескен отырысында «Қазақстан Республикасының Конституциясына өзгерістер мен толықтыру енгізу туралы» Заң қабылданған болатын.
Сонымен, Ата Заңның 5 бабына өзгерістер енгізіліп, 1 бап қосылды. Енді Президент мандаты қайта сайлану мүмкіндігінсіз бір мерзімге, яғни 7 жылға шектеледі.
Сондай-ақ, Конституциялық Сот судьяларының қайта тағайындалуына шектеу қоя отырып, олардың өкілеттік мерзімі 8 жылға дейін ұлғайтылады.
Сонымен қатар аталған Заңның аясында елорда атауы Астана болып өзгерді. Қыркүйек айының 17-і күні ел Президенті «Қазақстан Республикасының елордасы – Нұр-Сұлтан қаласының атауын Қазақстан Республикасының елордасы — Астана қаласы деп өзгерту туралы» тиісті Жарлыққа қол қойды.
Еске сала кетсек, 2 қыркүйекте «Жаңа Қазақстан» депутаттық тобының мүшелері елорданың бұрынғы атауын қайтаруды ұсынған болатын. Осылайша, Нұр-Сұлтан атауын өзгерту туралы ұсыныс Конституциялық заң жобасына енгізілді.
Ал 14 қыркүйекте ономастикалық комиссия елорда атауын өзгерту туралы ұсынысты қолдаса, 15 қыркүйекте қоғам өкілдері мен мәслихат депутаттары елорданы Астана деп қайта атау туралы ұсынысты қолдады.
Президент Қасым-Жомарт Тоқаев 1 қыркүйекте Қазақстан халқына арнаған Жолдауында кезектен тыс сайлау өткізуді және Президентті жеті жылға бір реттік мерзімге сайлауды, қайта сайлауға тыйым салуды ұсынған болатын.
«СТ» — ақпарат
