ӘЛЕУМЕТТІК САЛАНЫ ЖАҢҒЫРТУ ЖАЛҒАСАДЫ
Шығыс Қазақстан облысының әкімі Даниал Ахметов облыстық мәслихаттың 19 сессиясында депутаттар алдында ШҚО-ның дамуының маңызды аспектілері туралы есеп берді.
Аймақта экономикалық көрсеткіштердің барлық индикаторлары жақсы қарқынмен жүзеге асырылуда. Мәселен, Индустриялық секторда кәсіпкерлікті қолдау картасы бойынша экспортқа бағдарланған өндірістерді құру үшін 32 жоба іске асырылды. Бұл — АЭС үшін жылу бөлетін құрамалар шығаратын зауыт. Қыркүйек айынан бастап зауыт Қытай нарығына өнім жеткізуге кірісті. Жоба Қазақстанға Атом станциялары үшін ядролық отын өндіруші және жеткізуші мемлекеттердің шектеулі шеңберіне кіруге мүмкіндік береді. ТМК Сәтбаев кен орнында екінші байыту фабрикасын іске қосты. Жыл соңына дейін Стриженск кен орнының полиметалл және мыс-колчедан кендерін өнеркәсіптік игеру жобасын іске асыру жоспарланған. Жақын арада Тарбағатай ауданында қуаты жылына 25 млн тонна мыс кенін өңдейтін тау-кен байыту комбинатының құрылысы басталады. Басқа да жобалар іске асырыла бастайды.
Шағын және орта бизнес жұмысының тиімділігі маңызды көрсеткіш болып табылады. Жыл басынан бері барлық мемлекеттік бағдарламалар аясында 384 жоба субсидияланды.
— Агроөнеркәсіптік секторды дамыту бойынша Мемлекет басшысы алға қойған міндеттерді шеше отырып, жақын арада біздің өнімді ҚХР стандарттары бойынша сертификаттауға мүмкіндік беретін биозертхана жұмыс істей бастайды. Біз ғимарат салдық, барлық инфрақұрылымды дайындадық. Қытай тарапы құрал-жабдықтар жеткізіп, біздің мамандарды оқытады, бұл — біздің өңір үшін өте маңызды жоба. Біз 2 бағдарлама аясында шекаралас аудандар мен бұрынғы аудан орталықтарын дамыту жобаларын жалғастырамыз, — деп атап өтті Даниал Ахметов.
Даниал Ахметовтің айтуынша, облыста әлеуметтік саланы жаңғырту жұмыстары жалғасуда. Денсаулық сақтау және білім беру жобалары бұрынғысынша басымдыққа ие болып отыр. Президенттің Жолдауында қойылған міндеттерді іске асыру аясында 2023 жылдан бастап екі жыл ішінде медициналық мекемелері жоқ ауылдарда медициналық және фельдшерлік-акушерлік пункттер салынып, толық жарақтандырылады.
Сондай-ақ «Жайлы мектеп» ұлттық жобасы аясында 2025 жылға дейін заманауи талаптарға сай 20 мектеп іске қосылады.
— Қасым-Жомарт Кемелұлы Тоқаевтың тапсырмасына сәйкес, ірі инфрақұрылымдық жоба — Бұқтырма су қоймасы арқылы көпір салу жұмыстары жалғасуда. Бүгінгі күні облыстың әрбір елді мекені бойынша өзекті мәселелер тізбесі жасалған, оларды шешу, бірінші кезекте, шығысқазақстандықтардың өмір сүру сапасын арттырады,- деп атап өтті облыс әкімі.
Зарина КӘП,
«Семей таңы»
