16 желтоқсан күні Достық үйінде қаладағы жастар ұйымдарының белсенді мүшелері мен зиялы қауым өкілдері және жергілікті билік өкілдерінің қаты— суымен Тәуелсіздік күні мерекесіне арналған дөңгелек үстел өтті. Жиынға қатысу— шылар Халық каһарманы Қайрат Рысқұлбековтің ескерткішіне гүл шоқтарын қойды.
Нұрдәулет КӘКІШЕВ, «Семей таңы»
Халық каһарманының ескерткішіне тағзым етіп, гүл шоғын қою рәсіміне қатысушылар 1986 жылғы Желтоқсан оқиғасында көз жұмғандарды бір минуттық үнсіздікпен еске алды. Шараға студенттер мен Желтоқсан оқиғасына қатысушылардың өздері де жиналды.
— Қазіргі жас ұрпақтың бабалар ерлігін ұмытпауы, сонымен қатар, Қайрат Рысқұлбековтің ескерткішіне келіп, батырдың рухына тағзым етіп, гүл шоқтарын қоюы қуантарлық жағдай, — дейді қала тұрғыны, Желтоқсан оқиғасына қатысушылардың бірі Талғат Саурықов.
— Біз бірлікті, бейбітшілік пен келісімді қолдайтын көпұлтты мемлекетпіз. Тәуелсіз елдің жастары өздерін бақытты санауға әбден болады. Бүгінде қазақстандықтар өз ана тілінде білім алып, өз Республикасының заңына бағынуда. Сондықтан, олардың әрқайсысы өз елінің, туған қаласының, отбасының патриоттары болып, алдарына үлкен мақсат қоюға тиіс, — деген дөңгелек үстелге қатысушылардың бірі Эльмира Жүрсінбекқызы, — жастардың тек алға ұмтылып, егемендігімізді сақтап, өз мемлекетіне зор еңбегін сіңіретініне үлкен сенім артамыз, — дейді.
Ал жастардың атынан сөз алған «Жас Отан» жастар қанатының белсенді мүшесі Мұхтар Баймағұлов жиынға қатысушыларға алғысын білдіріп өтіп, жас ұрпақты мықты мемлекеттің тірегі болуға шақырды. Осылайша аға буын мен жас толқын еркін пікір алмасып, өзге де қатысушылар төл мерекемен құттықтап, жылы лебіздерін білдірді.
