Облыстық әкімдікте Абай облысы Мәслихатының кезектен тыс жетінші сессиясы өтті. Отырысқа аймақ басшысы Нұрлан Ұранхаев, Мәслихат хатшысы Қуаныш Сүлейменов, әкім орынбасарлары, депутаттар мен БАҚ өкілдері қатысты.
Отырыстың күн тәртібінде 2022-2024 жылдарға арналған облыстық бюджетке өзгерістер мен толықтырулар енгізу, мұқтаж азаматтардың жекелеген санаттары үшін «KARAGAILY» шипажайы Семейлік медициналық-әлеуметтік мекемесінің базасында санаторлы-курорттық емдеуді ұйымдастыру» жобасындағы мемлекеттік міндеттемелерді қабылдау, сонымен қатар Курчатов қаласындағы «Тополек» бала-бақшасын қайта құру жобасын қайта қарау сынды мәселелер қаралды.
Аймақтық қаржыны қайта қарау туралы экономика және бюджеттік жоспарлау басқармасының басшысы Роза Құдайбергенқызы баяндады.
-Шығыс Қазақстан облысынан бөлінген қаржының жалпы соммасы 248,214 млн теңге. Оның ішінде облыстық бюджет 204,452 млн теңгені құраса, аудан мен қалалар бюджеті 43,7 млн теңге. Облыстық бюджеттің құрылымының меншікті кіріс көздері 8,95 млрд теңге, төмен тұрған бюджеттерден түсетін трансферттар 24,4 млрд теңге, республикалық бюджеттен түсетін қаржы 83,3 млрд теңге, -дейді Роза Құдайберген қызы.
Сессия барысында күн тәртібіндегі мәселелер бірден мақұлданып, басқа да өзекті тақырыптар сөз болды. Айтап айтар болсақ, облыс мәслихат депутаты Серік Байғалиев «Семей Водоканал» су арнасының проблемаларын бірнеше жылдан бері көтеріп келе жатқанын, алайда шағымдардың қайта қаралмайтындығын жеткізді.
-«Семей Водоканал» кәсіпорнында көптеген мәселелер бар: су құбыры желілерінің тозуы, білікті мамандардың (дәнекерлеушілер, слесарлар және т.б.) жетіспеуі, жалақының төмендігі, су құбырының сорғыларының істен шығуы. Жағдай жыл сайын қиындап барады, үнемі болатаын апаттар адамдарды бірнеше күн сусыз отыруға мәжбүр етеді. Бұл мәселе Семей қаласының барлық аудандарында бар. Су құбыры толық қайта құруды қажет етеді, апатты учаскелерді ішінара жөндеу мәселені шешпейді деп ойлаймын, -деді депутат өз сөзінде.
Жақында Абай облысы жастары қаламыздағы қоқыс туралы айтып, тұрғындары тазалыққа шақырып жаңа бастама көтерген еді. Бұл туралы облыс әкімі Нұрлан Ұранхаев та құлағдар болған.
-Жастарымыз жақсы бастама көтеріпті. Бұндай жобаны қолдайық, қоғамдық кеңеспен сөйлесейік. Семейді қайтадан рухани-мәдени орталығы болуға жұмыс жасайық, -дейді аймақ басшысы Нұрлан Ұранхаев.
Сессия қорытындысы бойынша барлық аталған түйіткілді мәселелер қайта қаралып, өз шешімін табады деген үміттеміз.
Талшын ҚАЛИАСҚАР,
«Семей таңы»
«Семей таңы»
