Әйгерім Сәрсенғали
«Семей таңы»
Елбасымыз дархан даламыздың иесі мен киесі болатын ұрпақтың көбеюін, демографиялық ахуалды жақсартуa керектігін жыл сайынғы халыққа жолдауында ғана емес, барлық сөйлеген сөздерінде жиі қайталайды. Биыл Тәуелсіздігіміздің 22 жылдығы қарсаңында 16 желтоқсан күні қаламызда 14 бала дүниеге келді. Перинаталық орталық басшысы Архат Дайырбековтың айтуынша, 2012 жылы 3,5 мың сәби дүниеге келсе, бүгінде ол есеп 6 мыңға жетіп отыр. Мереке күні аталмыш орталықта үш ұл, үш қыз — 6 бала дүниеге келген.
Статистикалық мәліметтерге сүйенсек, 5 жылда елімізде ана мен бала өлімі 3 есе азайып, туу көрсеткіші 1,5 есеге көбейген. Қазақстан халқының саны жыл санап артуда. Мереке қарсаңында халық санының артуына үлес қосып отырған аналардың қуаныштарында шек жоқ. Екі ұлынан кейін дәл осы күні қыз баласын бауырына басқан жас ана Айнұр Байжұманова орталықтың дәрігерлерін мерекемен құттықтап, алғысын білдірді. Ал, Аяна Асқарова үшін 16 желтоқсан қасиетті күн. Ең алдымен Тәуелсіздік күні болса, екіншіден, 2010 жылы 16 желтоқсан күні Зере есімді тұңғышы туылған. Араға үш жыл салып жас ана дәл осы күні тағы да нәрестелі болып отыр. Барша қазақстандықтарға жанұя бақытын тілеген жас аналар еліміздің ертеңі болар азаматтардың іңгәлаған дауысы бүгінгі күні перзентханаларда үзілмесін деген ниеттерін білдірді. Өз кезегінде ақ халатты абзал жандар Тәуелсіздік күні дүниеге келген сәбилердің бауы берік болсын деп тілек тілеп, аналарға сыйлықтар тапсырды.
