Нұрдәулет КӘКІШЕВ,
«Семей таңы»
Өткен жұма күні Семей қаласының Шәкәрім атындағы мемлекеттік университетінде аталмыш оқу орнының ректоры Шәріпбек Әмірбеков бастаған білім ордасының барлық қызметкерлерінің қатысуымен Тәуелсіздік күніне арналған «Асқар елдің айбынды тәуелсіздігі» атты салтанатты жиын өтті.
Сап түзеген «Жасұлан» ерлер лицейінің оқушылары көк байрағымызды сахнаға алып шығып, мемлекеттік Әнұранымыз орындалған соң салтанатты жиында алғашқы болып Семей қаласының Шәкәрім атындағы мемлекеттік университетінің философия кафедрасының меңгерушісі Айзат Мұқатаева сөз алды.
— 22 жасқа толып отырған мемлекетіміз тәуелсіздіктің арқасында табысты же-тістіктерге жетіп отыр. Мемлекеттің ең басты жетістігі — еліміздің бірлігі, қауіпсіздігі мен тыныштығы, қоғамдық татулық пен тұрақтылық, — деген Айзат Амантайқызы еліміздің бағындырған биік белестерімен қатар, университеттегі биылғы атқарылған жұмыстар туралы, сонымен қатар, оқу орнының желеу етер жетістіктері жайлы айта келіп, білімпаз және белсенді студенттердің есімін тізбектеп, әріптестеріне деген жылы лебізін білдірді.
Ал, одан кейін сөз алған Семей қаласының Шәкәрім атындағы мемлекеттік университетінің ректоры Шәріпбек Әмірбеков:
— Құрметті, әріптестер! Ұлы мерекеміз – Тәуелсіздік күні құтты болсын! Барлықтарыңыздың отбасыларыңызға бақыт, дендеріңізге саулық, істе-ріңізге сәттілік тілеймін! – деп сөзін бастап, ары қарай егеменді ел болуды аңсаған тарихтағы би-шешендердің сөзін арқау ете отырып, «Ата-бабаларымыз аңсаған азаттық» деген сөз тіркесінің мағынасын тарқатып айтып берді.
Аталмыш білім ордасының басшысы сөз соңында елеулі еңбектері үшін университеттегі бірқатар қызметкерлерді ҚР білім және ғылым министрлігінің сыйлығымен, ШҚО әкімінің және Семей қаласы әкімінің граммоталарымен, сонымен қатар, ректордың алғыс хатымен марапаттады.
Марапаттаудан соң осынау салтанатты жиын аталмыш оқу орнының өнерлі студенттерінің концерттік бағдарламасымен жалғасты. Сахна шымылдығы хордың орындауындағы патриоттық әнмен ашылды. Одан кейін көрініс қойылып, көркем сөз оқылды. Концерттік бағдарлама барысындағы мың бұралған би де, күмбірлеген күй де, шырқалған ән де – бәрі-бәрі жиналған көпшіліктің көңілін тасытты. Ал, аталмыш университеттің студенті, жас ақын Қуаныш Нұржанов сахна төрінде домбырамен Тәуелсіздік туралы арнауын орындады. Жалынды жастар мен ұйымшыл ұжым өнерпаздарға деген қошеметтерін аямады. Тәуелсіздік күніне арналған салтанатты жиыннан зор әсер алған көпшілік патриот жастардың өнеріне тәнті болып, елдің ертеңіне деген сенімдері арта түсті.
