Әлемдегі күрделі экологиялық жағдай бүгінгі күннің өзекті мәселелердің біріне айналып отыр. Адам баласының шаруашылықтағы кез келген әрекетінен шыққан әр түрлі қалдықтар биосфераны ластауда. Бұл халықтың денсаулығы мен өміріне қауіп-қатер тудырып, флора мен фауна түрлерінің азаюына, қоршаған ортадағы тепе-теңдіктің бұзылуына әсер етуде.
Талшын ҚАЛИАСҚАР,
«Семей таңы»
Қоршаған ортаны ластайтын көздердің бірі — қоқыс қалдықтары. Жер бетінде жинақталған зиянды заттар топырақ жамылғысына, өсімдіктерге, жер үсті және жер асты суларына жағымсыз әсерін тигізеді. Бүгінгі күнде экология мәселесі ауыл-аймаққа да жеткен. Көптеген елді мекендер шетіндегі қоқыс полигондары толып, санитарлық талаптарға сай келмейтін жағдайға жеткен.
Жуырда Тарбағатай ауданының әкімі Дархан Жөргекбаев Ақжар ауылының санитарлық жағдайын бақылап, қоқыс төгетін орынды көріп қайтты. Нәтижесінде Тұғыл ауылына шығаберістегі жол бойында орналасқан қатты қалдықтар полигонына қоқыс төгуді тоқтату туралы шешім қабылданды.
«Бұл жерге қоқыс төгетін орын салу бастапқыда бұрыс қабылданған шешім деп санаймын. Сол себепті қатты қалдық төгу орнын Ақжар ауылынан Жаңалық ауылына шығаберістегі төрт шақырым жердегі жолдың оң жағына ауыстыруға тапсырма бердім. Сіздерден аулаларды және ауылдық округ аумағын таза ұстауды сұраймын. Ақжар ауылының ипподромындағы «Ауыл» участогіне және Тұғыл ауылына шығаберістегі телімге қоқыс тастамауға шақырамын», — деп жазды аудан басшысы өзінің инстаграм әлеуметтік желісіндегі жеке парақшасында.
Аталған орынды тазалау ауылдық округ әкіміне тапсырылды.
Еске сала кетелік, қоқыстар жанған кезде атмосфераға өте көп улы заттар бөлініп, тыныс алу жүйесі аурулары мен репродуктивті және иммундық жүйелердің ауытқуларына әкеп соғуы мүмкін. Үлкен қауіп-қатердің алдын алу мақсатында ел болып жанашырлық танытуымыз қажет. Ол үшін жүрген жерімізді ластамайық. Ауыл тазалығына әрқайсымыз жауаптымыз.
