Жуырда Шығыс Қазақстан облысының әкімі Бердібек Сапарбаев арнайы іс-сапармен Бесқарағай ауданында болып, аудандағы бірқатар нысандарды аралап, жұмыс барысымен танысты. Облыс әкімі алдымен Жыланды ауылында биылғы жылы бой көтерген салтанат сая-бағына келіп, «Семей Орманы» МОТР ММ Жаңа Семей филиалының директоры Арғынбек Сафиоллаұлының бастамасымен жүзеге асқан жұмысты көрді.
Әсел ҚАСЫМҒОЖИНА, «Семей таңы»
Саябақтың төрінде орнатылған ескерткішке өңір басшысы оң бағасын беріп, тарихты білу, Тәуелсіздікке өз үлестерін қосқан ата-бабаларымыздың аттарын ардақ тұту парызымыз екендігін де атап өтті. Жыланды орта мектебін, медицина бөлімшесін, кітапханасын аралап, оқушылардың білім сапасына, асхана жағдайына, ауыл тұрғындарының денсаулық жағдайына қатысты жайттарды сұрап білді .
Содан кейін ағаш өнімдерін дамыту мақсатында Жыланды ауылының аумағында «Биоотындық брикеттерді өндірудің инновациялық бизнес-жобасы», «Эко–Отын» ЖШС жетекшісі Аман Сейітқановпен жүздесіп, тас көмір мен ағаштарды алмастыра алатын өтімсіз ағаштарды биоотындық брикетке қайта өңдеуді мақсат етіп отырған жобамен жақынырақ танысты. Аталған қосымша жобаның іске асырылуы ауданның өнеркәсіп өнімін рейтингтік және экономикалық көрсеткіштерді жақсартуға мүмкіндік беретіндігі айтылды. Сол сияқты «Екі дос» ЖШС Бесқарағай ауданында сауықтыру кешенін салуды қолға алғандығы, ойға алған мақсаттарын іске асыру үшін Старая Крепость ауылының маңынан 3 мың гектар жер бөлінгендігі, бұл кешенде марал мүйіздерінен жасалатын дәрімен, сазбен, ат үстінде серуендеумен емдеу жүргі-зілетіндігі, бұл жобада демалыс саябағын, хоккей қорапшасын, шаңғы базасын ашу да қарастырылғандығы туралы толық мәлімет берілді. Болашақта кешен ауданның әлеуетін арттырып, туристік саланың дамуына ықпалын тигізетіндігі де ескерілді.
Бердібек Мәшбекұлы бұдан кейін Канонерка тірек ауылына тоқтады. Ауыл ахуалымен танысып, осы күні іске қосылған «Isun Plast» ЖШС плас-тикалық құбырлар шығаратын кәсіпорынының ашылу салтанатына да қатысты. Бердібек Мәшбекұлы Канонерка орта мектебінде де болып, 40 жылдан астам тарихы бар мектеп күрделі жөңдеуді қажет етіп тұрғандығын бірден байқады, төбе-сінен су ағып, терезелері, едендері тозған мектепке көмек көрсету керектігін, ол үшін қажетті құжаттарды дайындап облысқа жолдауды аудан әкіміне тапсырды. Аймақ басшысы Қарамырза ауылындағы орман тұқым-бағы кешені салынып жатқан құрылыс алаңына барып, құрылыстың сапасын да қарап шықты.
Бесқарағай ауылына келген аймақ басшысы күрделі жөндеуден өткен «Нұр Отан» партиясының ғимаратын, ондағы аудандық жастар орталығын, шіркеуді де көріп, атқарылған жұмысқа оң бағасын берді. Аудандық Достық үйінде ұйымдастырылған Тәуел- сіздік құрдастарымен кездесуде аймақ басшысы жастардың жылы лебіздерін тыңдап, аға буын атынан дөңгелек үстелге қатысушыларды Тәуелсіздік мерекесімен құттықтады.
Бердібек Мәшбекұлы «Қолжетімді баспана — 2020» бағдарламасы бойынша аудан орталығында бой көтерген 2 пәтерлі 2 тұрғын үйдің кілтін иелеріне табыстады. Аймақ басшысының Бесқарағай ауданындағы іс-сапары аудандық әкімдікте өткізілген отырыспен қорытындыланды. Отырыс барысында Бердібек Сапарбаев аудан әкімі Нұрлан Бәтташұлы бастаған атқарушы билікке ауданының биылғы жылғы жұмыс қарқыны жаман болмағандығын, келер жылы бұдан да жоғары көрсеткіштерге қол жеткізулеріне тілектес екендігін білдірді.
