16 желтоқсан—Қазақстан Тәуел—сіздігінің 22 жылдық мерейлі мерекесі күні Үржар ауданының әкімі Серік Зинабек—ұлы Зайнулдин Қарабұта ауылындағы заманауи жаңа емхананың ашылу салтанатында сөйлеген сөзінде Елбасына, облыс әкімі Бердібек Мәшбекұлына Үржар ауданы халқының атынан алғыс сезімін білдірді:
— Бүгінгі мерекеге облыс әкімі Бердібек Мәшбекұлы Сапарбаевтың өзі қатысып, бірқатар нысандардың ашылу салтанатына қатысуы керек болатын. Өкінішке орай, ауа райының қолайсыздығына байланысты облыс басшысы келе алмады. Өздеріңізге мәлім, мұндай үлкен құрылыстар шалғайдағы ауылдарда бұрын-соңды болып көрген жоқ. Міне, бір ғана жазда біз Қарабұта, Көктерек, Барқытбел, Бестерек ауылдық округтерінде дәл осындай заманға сай жабдықталған амбулаториялар салып бітірдік. Бүгін Қарабұта ауылында соның алғашқысының ашылу салтанатын өткізіп отырмыз. Ауданымызда бұлардан өзге де мектептердің, балабақшалар мен көптеген тұрғын үй ғимараттарының құрылыстары жүргізілуде. Бұл біздің Тәуелсіздігіміздің арқасы, Елбасы Нұрсұлтан Назарбаевтың салиқалы саясаты мен облыс әкімі Бердібек Сапарбаевтың Үржар ауданына деген дұрыс көзқарасының жемісі деуге болады. Сондықтан, қадірлі халайық, сіздердің аттарыңыздан барша жанашырларымызға алғыс айтуға рұқсат етіңіздер. Осы емхананы салып бітірген «ЦАРП» ЖШС-інің басшысы, орталарыңызда тұрған Серікболат Бейсекенов мырзаға айрықша рахмет айтқым келеді. Ол облыс әкімі Б. Сапарбаевтың «Туған жерге тағзым!» акциясына үн қосып, аудан орталығындағы «Бәйтерек» монументінің құрылысына 6 миллион 600 мың теңге қаржы бөлген азамат,-дей келіп, аудан әкімі Серік Зинабек-ұлы осы ауылдағы құрылыс жұмыстарына бел шеше атсалысқан бір топ азаматтарға да ризашылығын білдірді. Сөз алған осындағы клуб үйінің меңгерушісі, аудандық мәслихаттың депутаты Сейітқазы Мұздыбаев аудан әкімінің аз ғана уақыттың ішінде тындырған істерін тілге тиек ете келіп, бүгінгі емхана құрылысының да қарқынды жүргізіліп, ойдағыдай аяқталғандығын алға тартты. Бас мердігер «ЦАРП» ЖШС-інің басшысы Серікболат Бейсекенов Қара- бұта ауылдық амбулаториясының бас дәрігері Бақыт Күнтороваға кілтті салтанатты жағдайда табыс етті.
Сол күні аудан орталығында техника шеруі өтіп, оған осындағы қысқы мерзімге сақадай сай тұрған 48 қуатты техника сап түзеп, аудан әкімі Серік Зайнулдин бастаған аудан басшылары бірқатар механизаторларға ауыр автокөліктер мен тракторлардың кілттерін тапсырды.
-Біздің еліміз жыл сайын алға қадам басып, қуатты мемлекетке айналып келеді. Алғаш Тәуелсіздігімізді алған жылдары осындай ауқымды шаралар өткізу біздер үшін аса қиынға түсетін-ді. Биылдың өзінде аудан көлеміндегі жолдарды жөндеуге, оны қардан тазартуға 210 миллион теңге ақша бөліп отырмыз, -деді аудан басшысы.
Түс ауа Қоңыршәулі ауылдық округінде Қазақстан Республикасы Тәуелсіздігінің 22 жылдық мерекесіне орай салтанатты жиын өтіп, соңынан аудандық мәдениет және тілдерді дамыту бөлімінің концерттік бағдарламасы көрсетілді. Салтанатты шара Таскескен ауылында жуырда ғана қайта жөндеу көрген Мәдениет үйінде өтіп, онда аудан басшысы 2013 жылы қол жеткізген табыстарымыз бен алда тұрған межелерді саралап өтті.
-Ел Тәуелсіздігінің 22 жылдық торқалы тойына біз қомақты табыстармен келдік. Бүгінде еліміз дүниежүзінің дамыған 50 елінің қатарына белгіленген межеден көп бұрын енді. Енді 2050 жылы әлемдегі дамыған 30 мемлекетпен тереземіз тең болады, деп жоспарлап отырмыз. Сол үшін «Қазақстан 2050» Стратегиясын қабылдадық. Бұл межеге барша халық болып, «бір жағадан бас, бір жеңнен қол шығара» отырып жету-міндет. Ауданымыз бойынша атқарылып жатқан іс-шаралар да осыған келіп саяды. Өңір аграрлы сала. Биыл аудан көлемінде 172 мың гектар жерге егін егіліп, 31 миллиард 900 мың теңгенің ауылшаруашылығы өнімдері өндірілді. Астықтың әр гектарынан 20,6 центнерден өнім алдық. Мұндай мол байлық көп жылдардан бері көзден бұл-бұл ұшқаны жасырын емес. Бітік шыққан егінді төкпей-шашпай қамбаға құйып алдық деген аудан әкімі өңірімізде атқарылған ауқымды шаруаларды тілге тиек ете келіп, құрылыстары жүріп жат-қан әлеуметтік нысандардың жай-күйі жайлы баяндап, кемшіліктерімізді де жоюдың жолдарын қарастыру амалдарын іздеу қажеттілігіне тоқталды. Салтанатты шараға жиылған қауым алдында аудан халқын осынау ұлық мерекемен құттықтап, 2013 жылдың қорытындысы бойынша ауданымыздың өркендеуі мен гүлденуіне еселі үлес қосып, әр салада ерен еңбек етіп, елге еңбегі сіңген бір топ азаматтарды марапаттады. «Шапағат» медалін дәрігер-хирург Нұрлан Ченемесовтің омырауына қадаса, республикалық «Нұр Отан» партиясы төрағасының бірінші орынбасары Бауыржан Байбектің «Алғыс хаттары», Қазақстан Республикасының, облыс, аудан әкімдерінің «Құрмет грамоталары» өз иелерін тауып жатты. Сондай-ақ, «Жыл меценаты» К. Ақашева мен А.Сәметеев, «Жыл мемлекеттік қызметкері» М. Бапина, «Жыл мекеме басшысы» Ж. Саутов пен А. Зарипов, «Жыл ауылшаруашылық қызметкері» М. Қарашев, «Жыл кәсіпкері» Б.Мұсабаев, «Жыл мұғалімі» А. Базлуова, «Жыл денсаулық саласының қызметкері» Т.Егеубаев, «Жыл дәрігері» Б. Әзілханов, «Жыл мәдениет қызметкері» С. Мұздыбаев, «Жыл спортшысы» Е. Серікжанов, «Жыл адамы» М. Қалиев болып танылды.
Тәуелсіздіктің торқалы тойы Таскескен топырағында өтуінің өзіндік себептері бар. Біріншіден, Таскескен тірек ауылының сапында болса, екіншіден, аудан әкімінің қадағалауымен мұндағы Мәдениет үйі бас-аяғы 5 айдың ішінде толығымен күрделі жөндеуден өтті.(Құрылысты жүргізген осындағы «Терме ОСТ» ЖШС-і, басшысы Күләш Ақашқызы). Таскескен ауылының тұрғындары, жиналғандар, Тәуелсіздік мерекесі күні ел ішінде болып, еңселерін бір көтеріп тастаған аудан әкімі бастаған атқарушы билікке алғыс сезімдерін білдірісіп жатты.
Берікхан Тайжігіт,
Үржар ауданы.
