Халыққа қызмет көрсету орталығы — қазақстандықтардың игілігі үшін және жең ұшынан жалғасқан жемқорлықтың алдын алу мақсатында жасақталған мекеме. ҚР байланыс және ақпарат агенттігінің қарамағындағы ХҚКО 160 түрлі мемлекеттік қызметті ұсынады. Ұсынылатын қызметтердің көпшілігі бір мезетте электронды түрде іске асырылады.
Семей қаласында екі ХҚКО бар болса, соның бірі сол жағалауда орналасқан ШҚО бойынша «ХҚКО» РМК филиалы № 1 Семей қалалық бөлімі. Бірінші жартыжылдық қорытындысы бойынша ХҚКО № 1 Семей қалалық бөлімі 64 065 өтініш қабылдап, 68 004 құжат берді. Оның 50 461 элек-трондық қызметтерге тиесілі. Ал «Өзіне-өзі қызмет көрсету секторы» арқылы 21 067 қызмет түрі көрсетілген.
Бүгінгі күні мемлекеттік қызметтерді көрсету стандартына сәйкес, 19 түрлі жаңа қызмет пилоттық режимде тұрғындарға ұсынуға дайын тұр. Олардың ішінде «Мемлекеттік әлеуметтік атаулы көмек белгілеу», «Білім туралы құжаттың телнұсқасын беру», «1,6 және 7 дәрежелі қауіпті жүкті тасымалдауға арнайы рұқсат беру» қызметтері тұрғындар тарапынан сұранысқа ие болып келеді. Халыққа қызмет көрсету орталығы арқылы «Бала туу және бала күтіміне байланысты жәрдемақы тағайындау» мемлекеттік қызметіне өтініш білдіруге болады. Бұл тұрғындарға өте қолайлы қарастырылған. Бұл ретте кезек күтіп, уақыт шығындамайсың және дүйсенбі мен сенбі күндері аралығында сағат 09:00- ден 20:00 — ге дейін құжат тапсыруға болады. Орасан зор жұмысты мобильді жедел топтың қызметкерлері атқарады. Олар бірінші және екінші топ мүгедектеріне, қарт адамдарға мемлекеттік қызметтерді үйлерінде ұсынады.
{jcomments on}Тұрғындар әр мекеменің табалдырығын тоздырмас үшін, бүгінде ХҚКО-мен қатар , Еgov.kz электрондық үкімет порталы қызмет етуде. Портал арқылы 172-ден астам қызмет түрін үйден қадам аттап шықпай, жұмыстан қол үзбей тұтынуға мүмкіншілік бар. Сондай-ақ, ХҚКО-на келсеңіз де, кезек күтпей, «Өзіне-өзі қызмет көрсету секторынан» қажетті қызметті ала аласыз. Сұрақтар мен қиындықтар туындаған жағдайда орталықтың кеңесшісіне жүгініңіз, ол дұрыс бағдар беріп, қолғабыс етеді.
«Өзіне-өзі қызмет көрсету секторында» жұмыс істеу үшін электрондық-сандық қолтаңба (ЭЦП) қажет. Элек-трондық-сандық қолтаңбаны ХҚКО-нан 2 түрлі жолмен алуға болады:
1) флеш-тасымалдаушы немесе диск, 2) «чипті» жеке куәлікке жаздырып алу. ЭСҚ-ны әрбір азамат өзі алуға тиіс, болмаса сенімхат арқылы. Айта кетейік, «чипті» жеке куәліктегі ЭСҚ картридер құрылғысы арқылы оқылады. Картридер құрылғысымен ХҚКО барлығы қамтамасыз етілген. Ал кімнің жеке куәлігі ескі үлгіде болса, олар қызметтерді дәстүрлі түрде электрондық кезек немесе қоғамдық кіру нүктесі (ПОД) арқылы алады.
Семейліктер ЭСҚ рәсімдеу және алу, ақпараттық анықтамалар, зейнетақы салымдары туралы анықтама, мекенжай туралы мәліметтер, жылжымайтын мүліктің бар немесе жоқтығын растайтын анықтамаларды жиі алады. Сондай-ақ, ХҚКО-ның клиенттері арасында е-лицензиялау сайтын пайдалану жоғары сұранысқа ие болып отыр. Мысалы дәрігерлер санатты жоғарылату үшін құжаттарды рәсімдейді, халықаралық сертификаттарға өткізеді.
Тұрғындар көп тұтынатын қызмет — мекенжай анықтамасы. Ақпарат жеке тұлғаға қатысты құпия болғандықтан, анықтаманы әркім өзі немесе туыстық қатынасты дәлелдейтін құжаттары (туу тарлы куәлік, неке туралы куәлік) негізінде зайыбы, балалары және сенімхат негізінде үшінші тұлға ала алады. Құжаттарды жеделдік бойынша жасату тек құжаттандыру және жылжымайтын мүлікке құқықтарды тіркеу қызметтеріне қолданылады.
Еgov.kz электрондық үкімет порталының кеңестігі күн санап кеңеюде. Бүгінгі күні автокөлік иесінің екінші тұлғаға көлік жүргізуге беретін сенімхатты ақысыз портал арқылы жасауға болады. Бұл қызмет үшін бұрынғыдай нотари-усқа жүгініп, баж салығын төлеудің еш қажеті жоқ. Сенімхат жасату үшін көлік иесі және сенімхат алушы екеуі де болуы керек. Сондай-ақ, автокөліктің техникалық паспорты, мемлекеттік тіркеу нөмірі және сенім білдірушінің ЭСҚ болуы шарт. Аталмыш сенімхат 1 жылға беріледі. Барлық ақпараттар үшін өтініш берушілердің өздері жауапты, сондықтан, ұқыпты болғандары жөн.
ШҚО бойынша «ХҚКО» РМК филиалы № 1 Семей қалалық бөлімінде халыққа мемлекеттік қызметтерді сапалы және қолжетімді ұсыну үшін барлық жағдай жасалуда. Жұмыс сапасын бақылау мақсатында және тұрғындардың ой-пікірін білу ниетімен сауалнама жүргізіліп тұрады. Азаматтардың да жаңа технологияларды үйренуге құлшыныстары арта түсуде.
Г. ИДРИШЕВА, «ХҚКО»РМК филиалының ШҚО бойынша №1 Семей қалалық бөлімінің басшысы.
