Сәрсенбі күні кәсіпкерлер палатасының қалалық филиалы “Семей асбестцемент бұйымдар зауыты” ЖШС-мен бірлесе отырып, қаламыздың жобалау институттарының жетекшілері мен құрылыс ұйымдарының өкілдеріне зауытта шығарылатын өнімдерді таныстырды.
Кәсіпкерлер палатасының қалалық филиалының басты бағыттарының бірі — жергілікті тауар өндірушілерге қолдау көрсетіп, өнім түрлерін барынша көпшілікке таныстыру. Кездесуде жиналғандарға алдымен италиялық жаңа технология бойынша шығарылып жатқан мәрмәр-мозаикалық плиткалар мен басқа да көптеген өнім түрлері көрсетіліп, өндіріс орынында атқарылып жатқан жұмыс барысы таныстырылды.
— Кәсіпорын өндіретін тауарларды таныс-тыруға арналған кездесуде ағымдағы жылдың сәуір айынан шығарыла бастаған мозаикалық «TERRAZZO» плиткалары таныс-тырылды. Бұл өнім «Бизнестің жол картасы – 2020» бағдарламасы мен «Даму» қоры арқылы шығарылып отыр. Таныстырылымға жобалау институттарының жетекшілері мен құрылыс ұйымдарының өкілдері шақырылды. Ондағы мақсат — шақырылғандарға өнім түрлері жайлы ақпарат беріп, қандай бағада саудаланатын айтып жеткізу. Кейін жобалау институттарының өкілдері сметалық құжат жасауда жергілікті өнім түрлерін арттыра алады, сол сияқты құрылысшылар да осы бағытта жұмыс жасағандары абзал, — деген ШҚО кәсіпкерлер палатасы Семей қаласындағы филиалының директоры Ардақ Әділжанов алдағы уақытта да осы бағытта әртүрлі шаралар ұйымдастырылатынын атап өтті. — Семейде өндіріліп жатқан осындай өнім түрлерін таныстыру жұмыстарын болашақта да жүргізетін боламыз. Осы бағытта шараларды өткізуді нақты қолға алмақпыз. Бұл бірінші кезекте кәсіпорынның алға жыл- жуына серпіліс береді. Өйткені, жобалаушылар мен құрылысшылардың көбі ағымдағы жылдан бастап аталмыш өнім түрлерінің шығарыла бастағанын біле бермейді.
Семей асбестцемент бұйымдар зауыты 1961 жылы іске қосылған. Бүгінгі күні мекеме халықаралық стандартқа сай құрылыс материалдарын өндіретін қаладағы ірі кәсіпорындардың бірі саналады. Зауытта ирек және жазық шифер тақтасын, сонымен қатар, төбелік құм-цемент тақтасы мен сыртқы өңдеу тақтасын шығаратын 6 түрлі желі жұмыс істейді. Мұнда қазіргі уақытта тұрғын үй және басқа да ғимараттардың төбесін жабуға арналған орта қырлы асбестцементті ирек табақтар, қабырға тақталарын, панельдерін, жабындарын, қалқаларын дайындауға, сондай-ақ, тұрғын үй, қоғамдық және өндірістік ғимараттардың ішкі-сыртқы қап-тауына арналған асбестцементті жазық табақтар өндірілуде.
{jcomments on}
Кәсіпорын бүгінгі күнде бір ауысымда түрлі-түсті 4 мың тақта шығаруға қауқарлы. «TERRAZZO» технологиясы бойынша да көптеген жаңа құрылыс материалдарын шығара бастаған.
— Зауыт көптеген өнім түрлерін шығарады. Оның ішінде, көбі жабынды материалдары. Сондай-ақ, бетон өнімдері мен абаттандыру элементтері де бар. Бүгінгі күні мемлекеттің қолдауының арқасында «Даму» бағдарламасы бойынша мозаикалық «TERRAZZO» плиткаларды шығаратын цехтың жұмысын іске қосып отырмыз. Бұл Қазақстан үшін инновация, — дейді зауыт директорының орынбасары Расул Шайыскаков.
Өндіріс орнының өнімдерін бүгінде Семей қаласынан бөлек еліміздің бірқатар аймақтары және Орта Азия елдері пайдаланады екен. Енді, сәтін салса, отандық өнім Ресейге де жөнелтілмек. Қазіргі таңда зауытта 300-ден аса адам жұмыспен қамтылған.
Асан МЫРЗАХАНОВ, «Семей таңы»
