Абай облысының әкімі Нұрлан Ұранхаев жұмыс сапарымен Көкпекті ауданына барды. Сапар барысында өңір басшысы мәдениет үйінде аудан тұрғындарымен кездесті.
Халықпен кездесу барысында тұрғындар өздерін көкейкесті сұрақтарын қоя алды. Кездесуден кейін азаматтарды жеке мәселелері бойынша қабылдау ұйымдастырылды.
«- Облыс бойынша кәсіпкерлікті дамыту бағытында да оң өзгерістер бар. Бүгінгі таңда жұмыс істеп тұрған шағын және орта бизнес субъектілерінің саны– 45 907 болса, оның 1300-і Көкпекті ауданының аумағында орналасқан. Облыстағы бөлшек тауар айналымының көлемі 18%-ке ұлғайып, 284,2 млрд.теңгені құрады. Көкпекті ауданы бойынша бұл көрсеткіш – 2,5 млрд. теңге. Облысымыз — аграрлық аймақ. Осы саладағы қордаланған мәселелерді шешіп, өңірдің бәсекеге қабілетін арттыратын болсақ, өзімізді де, өзге өңірлерді де ауыл шаруашылық өнімдерімен қамтамасыз етуге толық мүмкіндігіміз бар. Қазіргі таңда, ауыл шаруашылығының жалпы өнім көлемі, өткен жылмен салыстырғанда, 18,3%-ке, яғни 266 млрд.теңгеден 314,4 млрд. теңгеге дейін өскен. Ауданның үлесі –7,3%. Мал басының өсімі, ет, сүт, жұмыртқа өндіру көрсеткіші біршама артып келеді,» — деді Абай облысының әкімі Нұрлан Ұранхаев Көкпекті ауданында тұрғындармен кездесуде
Сонымен қатар Үкіліқыз ауылында орналасқан «Өрнек» ЖШС сүт-тауар фермасына барып, оның қызметімен танысты. Бұл серіктестік 1996 жылы құрылған.
Мұнда өсімдік және мал шаруашылығымен айналысатын 250-ге жуық адам жұмыс істейді. Ферма басшысының айтуынша, бір сиырдан жылына 3 500 литр сүт сауылады. Жер учаскелерінің жалпы ауданы 35 мың гектардан асады. Облыс әкімі ауыл шаруашылығын дамыту ел экономикасындағы маңызы ерекше екенін атап өтті.
«Бүгінгі таңда жұмыс істеп тұрған шағын және орта бизнес субъектілерінің саны– 45 907 болса, оның 1300-і Көкпекті ауданының аумағында орналасқан», — деді облыс әкімі.
Нұрлан Ұранхаев Көкпекті ауданына сапары кезінде сонымен қатар Преображенка ауылында орналасқан «Өрнек» балабақшасында болды.
Ауылда «Өрнек» балабақшасы 2014 жылы ашылды. Балабақша 60 орынға арналған. Мұнда жоғары және орта арнаулы білімі бар мамандар жұмыс істейді. Сондай-ақ, өңір басшысы Преображенка орта мектебіне барды. Мұнда 1-11 сынып аралығында 204 бала білім алады. Аймақ басшысы Нұрлан Ұранхаев сондай-ақ Преображенка ауылындағы дәрігерлік амбулаторияға барды. Амбулаторияда стационарды алмастыратын медициналық көмек, амбулаториялық-емханалық және алғашқы медициналық-санитарлық көмек көрсетеді. Өңір басшысы құрылыс басқармасына жөндеу жұмыстарын жүргізу туралы сұрақты назарға алуды тапсырды.
«Ауылдық денсаулық сақтауды жаңғырту» жобасы аясында, медициналық қызметтердің сапасы мен қолжетімділігін одан әрі жақсарту үшін Көкпекті ауданында Шәріптоғай, Мамай, Биғаш, Қарамойыл, Үшкөмей, Үлгілі малшы ауылдарында 6 жаңа дәрігерлік амбулатория ашу жоспарланып отыр.
