Қала әкімі Айбек Кәрімов өткен аптада шаһардың сол жағалауындағы М.Әуезов даңғылында орналасқан 22 үйдің тұрғындарымен жүздесті. Қашан да тұрғындардың талап – тілегін, арыз – шағымдарын жіті назарында ұстайтын қала басшысы бұл кездесуге тұрғындардың өтініші бойынша арнайы келді.
Пәтер иелері кооперативінің төрағасы Павел Барановтың айтуынша, қарамағындағы үйде 230 пәтер, 600-дей тұрғын бар. Он екі қабаттан тұратын тұрғын үйдің тоқсаныншы жылдарды іргесі қаланып, бой көтерген. Қазір мұнда қысқы жылу маусымына қызу дайындық жүргізілуде. Тұрғын үйдің шатырын ауыстырып, жаңалау да жоспарда бар екен. Бұл бағытта тұрғындардан қосымша қаражат жинау қарастырылуда.
— Жоғарғы қабаттағы пәтерден су аққандықтан уақытша су өтпейтіндей жауып қойдық. Жылыту маусымына дайындалып, кейін қосымша қаражат жинап, шатырды қалыпқа келтіретін боламыз. Қыркүйек айының екінші жартысында құбырларды жуатын боламыз. Жылуға берешек тұрғындарымен тиісті жұмыстар атқарылуда, — дейді кооператив төрағасы Павел Баранов.
Бұл орайда, қала басшысы Айбек Кәрімов ортақ істе барлығының бір-біріне түсіністікпен қарау керектігін атап өтті. Сондай-ақ, тұрғындардың жылуға қарызы болған жағдайда оларға түсіндіру жұмыстарын тиянақты жүргізу керектігіне кеңес берді.
{jcomments on}- Биылғы жылы жылу электр орталығы қайта жаңғыртудан өтіп болады. 2015 жылдан бастап генератор құбырларын орнатуды бастаймыз. Сөйтіп, электр энергиясын өндіруді қолға аламыз. Сондықтан да, биылғы жылы ешқандай мәселе туындамауы керек. Енді, Үкіметтен желілерді жөнге келтіруде көмек сұрап отырмыз. Осы тұрғыдан алғанда келер жылы қалада ешқандай проблема болмайды. Сіздерге өздеріңіз өзара қарызы бар тұрғындармен жұмыс атқарғандарыңыз жөн, — деп атап өтті қала әкімі.
Айбек Мүталапханұлы қарызы бар пәтерлерді тексеріп шығуды қолға алуды тапсырды. Осы орайда, «Жылукоммуноэнерго» кәсіпорыны мен ТҮКШ бөліміне пәтерлерді аралап, қарыз болған жағдайда тұрғындардың тез арада қарыздарын жабу керектігіне бірлесе жұмыс жасауды жүктеді. Кездесу кезінде тұрғындар тарапынан биылғы жылы ыстық сумен қамтамасыз етілу жағы да сұралды.
— Келер жылдан бастап қаланың сол жағалауында ыстық су жыл бойы болады. Ал, биыл ыстық су тек жылыту маусымында беріледі. Біз «Шығысэнерготрейд» мекемесінің электр энергиясын тұтынамыз. 2015 жылдан бастап өзіміз 12 мегаватт электр энергиясын өндіруді жүзеге асыруды көздеп отырмыз. Сол кезде өзіміздің ішкі сұранысымызды толыққанда қамтамасыз ете аламыз. Келер жылы тағыда кварталішілік ыстық суға арналған құбыр орнатамыз. Сол кезде барып бұл мәселенің барлығы шешілетін болады. Жалпы, жылумен қамтамасыз ету төңірегінде жылдар бойы жиналған проблемалар 2015 жылдан бастап түбегейлі шешіледі. Бұл әсіресе, қаланың сол жағалауына қатысты, — деді өз сөзінде Айбек Мүталапханұлы.
Әлбетте, сол жағалауда ыстық су беруде мәселе жоқ екен. Тек тұрғындардың қарызы біраз іске қолбайлау болып отыр. Тұрғындар тарапы ыстық суға қол жеткізгісі келсе, тез арада коммуналдық берешектерін өтеуі тиіс.
Сол жағалауда орналасқан Первомайский, 37 мекенжайында болған Айбек Мүталапханұлы мұнда да тұрғын үйдің қысқы маусымға әзірлігімен танысты. Кооператив жетекшісі Райса Абдуллаеваның айтуынша, тұрғын үйдің коммуникация желілері ескірген, дегенмен тұрғындармен бірлесе тым тозығы жеткен жерлерді ішінара жөндеу жұмыстары атқарылып жатыр. Қала әкімі сондай-ақ, берешегі бар тұрғындармен жұмысты күшейтуді, олай болмаған жағдайда қатаң шаралар қолданылатынын да ескертті.
— Қазірден бастап тұрғындарды қысқы маусымға дайындау керек. Жылыту маусымына аз ғана уақыт қалды. Қазір көмір бойынша қарызымыз мөлшері 300 млн. теңгеге жетті. Электрэнергиясына 800 млн. теңгедей берешегіміз бар. Ал, тұрғындардың қарызы мөлшері 540 млн. теңге көлемінде. Сондықтан халыққа түсіндіру жұмыстарын күшейткен жөн, — деп атап өтті Айбек Мүталапханұлы.
Асан Мырзаханов,
«Семей таңы»
