Сәрсенбі күні қала әкімі Айбек Кәрімов Энергетик кентіндегі жаңадан салынып жатқан физика-математика бағытындағы Назарбаев зияткерлік мектебінің құрылыс алаңында болып, ондағы жұмыстармен танысты.
Аталмыш мектептің құрылыс жұмыстарын жүргізіп жатқан алматылық «BI Group» компаниясының өкілдерінің айтуынша, құрылыс жұмыстары 28 маусымда басталыпты. Мектептегі оқу кабинеттер, жатын бөлмелер мен спорт зал, жаттығу залдары, мәжіліс залы және асхананың көлемі 22550 шаршы метр аумақты алады екен.
«BI Group» құрылыс корпарациясының өкілі, жоба авторы Евгений Слученков мектеп жобасының жергілікті климатқа арнайы жасалғанын, мысалы, жауын-шашын мен қардың жаууына, қақаған қыстың суықтығы мен жаздың қапырық ыстықтығына шыдамды болатынын айтады. Соған орай, қабырғалардың қалыңдығы да талапқа сай көрінеді.
Мердігерлердің сөзіне сүйенсек, 720 орынға арналған мектептің 120 орыны интернат болмақ.
— Қазір мұнда 118 адам құрылысқа жұмылдырылды. Олар екі ауысым бойынша жұмыс істейді. Жұмысшыларға қажетті барлық жағдайы жасалды. Техникалар да жеткілікті. Ал, жобада қарастырылған жоғары сапалы құрылыс материалдарын Семейдегі бірқатар кәсіпорындардан сатып алудамыз. Мысалы, кірпіш, арматура сияқты құрылыс материалдары семейлік кәсіпорындардан тасымалдануда, — деген Евгений Сученков, — Электрмен қамтамасыз етілу жағынан аздаған мәселелер бар. Әзірге уақытша электр энергия көздері пайдаланылуда. Алайда, бұл мәселелер алдағы уақытта өз шешімін табады. Өйткені, қалалық әкімдік барлық мәселелерді өз бақылауда ұстап отыратын болады, — дейді тілшілерге берген сұхбатында.
{jcomments on}Сонымен қатар, жоба авторының айтуынша, мектептің құрылыс жұмыстары жыл 12 ай бойы жүргізіледі. Құрылысшылар қазіргі жылы мезгілді пайдаланып, қысқа дейін ғимараттың сыртқы жұмыстарын бітіруді жоспарлап отырған көрінеді.
— Жоспар бойынша қыркүйекте жертөлелермен қатар, қабырғаларды қалау жұмыстары басталады. Жалпы, қараша айының ортасына дейін ғимарат толықтай тұрғызылады. Ал, келесі жылдан бастап ғимараттың ішкі жұмыстары мен әрлеу-өңдеу сияқты жұмыстар жүргізіледі, — дей келе, Е.Слученков, — Мектептің барлық желілері, соның ішінде жылу жүйесі қаланың жылу орталығына қосылатын болады. Сонымен қатар, бұл балалар мекемесі болғандықтан, мектеп жанынан қосымша қазандық салынадаы, — деп атап өтті.
Құрылыс жұмыстарымен жіті танысқан қала әкімі Айбек Кәрімов мердігерлерге жұмысты уақытынан кешіктірмей әрі сапалы аяқтауды тапсырды. Қала басшысы қарағайлы орман маңындағы бұл жер болашақта шаһардың көрікті көшелерінің бірі болатынын тілге тиек етті. Бұл орайда, Айбек Мүталапханұлы қалалық сәулет және қалақұрылысы бөлімінің басшысы Қалдыбек Қоқиланов пен қалалық жер қатынастар бөлімінің басшысы Құдайберген Сейілхановқа тиісті тапсырмаларын жүктеді.
Мердігерлердің сөзіне сүйенсек, жаңа ғимараттың құрылыс жұмыстары келер жылдың шілде-тамыз айларында толықтай аяқталып, мектеп келесі жаңа оқу жылында пайдалануға беріледі деп жоспарлануда.
Нұрдәулет КӘКІШЕВ, «Семей таңы»
