Шәкәрім университетінде оқу орны серіктестерімен бірлесе қолға алынған «Centrium» — балаларды, жасөспірімдерді және жастарды дамыту орталығының таныстырылымы өтті. Салтанатты шараға Шәкәрім университетінің басқарма төрағасы — ректоры Бауыржан Ердембеков пен орталық басшысы Айнұр Қадырова өзара ынтымақтастық туралы меморандумға қол қойды. Рәсімге университет басшылығы, профессор-оқытушылар құрамы мен БАҚ өкілдері қатысты.
Дана ТАЛҒАТБЕК,
«Семей таңы»
Шәкәрім университетінің педагогикалық бағытта білім алатын студенттері үшін тәжірибелік алаң болатын орталықта балаларды мектепке, Назарбаев Зияткерлік мектебі мен экономикалық лицейге, ҰБТ-ға дайындап, қазақ, орыс, ағылшын, қытай тілдері бойынша курстар және жеке сабақтар жүргізіледі. Сонымен қатар коворкинг орталығы, би, шахмат, каратэ секциялары да бар.
Шәкәрім университеті мен орталық арасындағы ынтымақтастық білім алушыларды дуалды оқыту бойынша оқыту, педагогикалық тағылымдамадан өткізу, түлектерді жұмысқа орналастыру, кәсіптік бағдар беру жұмыстарын жүргізуде ұзақ мерзімді байланыстар орнатуға бағытталған.
«Centrium» орталығының құрылтайшыларының бірі Гүлжанат Рахатқызы тәжірибелік алаң ретінде ашылған орталық екі жаққа да тиімді болатынын атап өтті.
— Ең қымбат ресурс – бұл уақыт. Сондықтан да балаларды жан-жақты дамыту үшін біз академиялық білімді бір жерге топтастырдық. Академиялық оқытуға негізделген орталығымыз балаларды, жасөспірімдерді және жастарды әр түрлі бағытта дамытуға арналған. Біздің орталығымыздың ашылғанына бір жыл толады. Орталықты әрдайым жетілдіріп отыратын боламыз, мәселен, жақында 5-6 жастағы балаларға арналған мектепке дайындық курстарын аштық. Бүгін университетпен меморандумға қол қойдық, бұл орталықтың жаңа деңгейі, жаңа асуы деп түсінеміз. Өйткені біздің орталық университет үшін тәжірибелік алаң болса, осында тәжірибеден өткен студенттер маман ретінде жұмысқа тұруға мүмкіндік алады, — дейді Гүлжанат Рахатқызы.
Айнұр Қадырқызы мекемелер арасындағы ынтымақтастықтың маңыздылығын атап өтіп, Шәкәрім университеті ұлттық ғылым мен мәдениеттің ірі орталықтарының бірі екенін, оқу орны жоғары білімді кәсіби мамандарды, сапалы біліммен қаруланған педагогтерді дайындап жатқанын айтты.
Университет ректоры Бауыржан Амангелдіұлы өз кезегінде болашақ педагогтерді даярлауда осы тәжірибелік алаңның өзіндік алар орнын атап өтіп, алдағы уақытта университет оқытушылары үшін зерттеу алаңына айналады деген сенімін білдірді.
— Тәжірибелік алаң – инновацияны енгізу бойынша педагогикалық ғылым мен тәжірибенің бірлескен қызметін ұйымдастыру орны. Бүгінгі таңда оқу орнында педагогикалық бағытта бірқатар жұмыстар жүргізілуде. «Педагог-психолог», «Психолог», «Мектепке дейінгі оқыту және тәрбиелеу», «Бастауышта оқыту педагогикасы мен әдістемесі» мамандықтары бойынша білім алып жүрген студенттер іс-тәжірибеден өтіп, дуалды оқуға мүмкіндіктері бар. Білім алушылар сондай-ақ «Әлеуметтік кредит» жобасы аясында орталыққа келіп, сағаттарын өтей алады. Бұл өз кезегінде орталық пен білім ордасы арасындағы байланысты нығайта түседі, — деді ректор.
Бауыржан Ердембеков болашақ педагогтерді сапалы даярлау үшін бірлескен іс-шаралар, ғылыми бағдарламалар мен жобаларды жүзеге асыруға дайын екендігін атап өтті. Университет басшысы «Абайтану» және «Абай оқыған ертегілер» кітаптарын орталықтың кітапхана қорына табыстады.
Сондай-ақ жиын барысында университет ректоры Ыбырай Алтынсарин атындағы №37 гимназияның 10-сынып оқушыларымен кездесіп, жоғарғы оқу орнын таңдауда көңіл аудару керек тұстарды атап өтіп, кәсіптік бағыт-бағдар берді. Оқушылар университеттің артықшылықтары, академиялық ұтқырлық, мамандықтар жайлы өздерін қызықтыратын сұрақтарына жауап алды.
