Қазіргі таңда отандық медицина саласында науқастарды оңалту шараларының маңызы арта түсуде. Ауыр өткен сырқаттанудан соң немесе жол апатына түскеннен кейін денсаулықты қалпына келтіру үшін оңалтудан өтудің мәні зор. Бұл ретте жаңадан құрылған Абай облысының тұрғындары үшін мүмкіндіктер кеңейіп келеді
Жуырда «Әлеуметтік медициналық сақтандыру қоры» КеАҚ-ның Абай облысы бойынша филиалы жергілікті БАҚ өкілдері үшін арнайы баспасөз турын өткізді. Өңірдегі балаларды оңалту қызметімен айналысатын медициналық ұйымдардың әлеуетімен таныстыруға бағытталған шара барысында филиал мамандары журналистерді Семей қаласындағы бірқатар нысандардың жұмысымен таныстырды. БАҚ өкілдері алдымен шаһардың 35-ші кварталында орналасқан «Iv plus» емханасына барып, ондағы оңалту бағытында жүргізіліп жатқан медициналық емшаралар туралы жан-жақты ақпарат алды. Аталған емханада әр түрлі диагноздары бар науқастар оңалтудан өтеді екен. Мұнда қажетті құрал-жабдықтың бәрі бар. ӘМСҚ облыс бойынша филиалының директоры Ғалымжан Әбілов атап өткендей, мекемеде заман талабына сай жаңашыл бағытта жұмыстар жүргізіледі. – Мұнда барлық халықаралық стандарттар сақталып, қажетті жабдықтар орнатылды. Бұл орайда ешқандай шағымдар жоқ, — дейді Ғалымжан Әбілов. Нысанның екінші ғимаратында Qamqorlyq оңалту орталығы орналасқан. Мұнда туа бітті дене кемістігі бар, тірек-қозғалыс аппараты жетілмеген немесе церебралды сал ауруымен ауыратын сәбилер кешенді ем қабылдайды екен. — Мұнда, негізінен, күн сайын келуге мүмкіндігі жоқ шалғай аудандарда тұратын балалар оңалтудан өтеді. Біз оларға тәулік бойы осында болуға мүмкіндік жасадық. Бүгінде әр ауданнан келген 13 бала ем алуда. Олар 21 күн ішінде толықтай оңалтудан өтеді. Жалпы, оңалту шаралары, көріп тұрғандарыңыздай, қолжетімді әрі тек жақсы нәтижелер беріп жатыр. Біз бұл медициналық ұйымды толық қаржыландырамыз, қажеттіліктер болып жатса, қосымша қаражат бөлуге де дайынбыз, — деп атап өтті бұл орайда Ғалымжан Әбілов. Ал аталған нысанның үшінші қабатында ересектер үшін оңалту емшаралары жүргізіледі екен. Онда, негізінен, жол апатына түскен немесе инсульт алғаннан кейін денсаулығын қалпына келтіру үшін келген жандар емделуде. Оларға арнайы бекітілген дәрігер-нұсқаушылар тиісті көмек көрсетуде. Бүгінгі таңда облысымызда осындай тағы төрт оңалту орталығы жұмыс істеуде. Олардың барлығы да тұрғындар үшін тегін. Тек басты шарт – азаматтар МӘМС жүйесінде сақтандырылған болу керек. — 2023 жылға оңалту шараларына шамамен 3 млрд теңге бөлінеді. Бұл — биылғы жылмен салыстырғанда 17 пайызға жоғары көрсеткіш. Тұрғындар тарапынан сұраныстың артқаны байқалады. Емдеудің толық циклін алу үшін азаматтардың сақтандырылған болуы өте маңызды. Бүгінде Абай облысында төрт жоғары мамандандырылған оңалту орталықтары жұмыс істейді. Ал қалғандары екінші деңгей ретінде түрлі медициналық ұйымдарда орналасқан, мысалы, инсульт орталықтарында да осыған ұқсас оңалту жұмыстары жүргізіледі,- деді өз сөзінде Ғалымжан Әбілов. Жалпы, бүгінгі таңда облыстағы медициналық оңалту қызметі бір жолға қойылды деп айтуға болады. Бұл орайда жергілікті дәрігерлер қауымы жыл сайын тұрғындарға тиімді қызмет көрсету үшін біліктілікті арттыру курстарынан өтіп тұрады. Себебі ауыр науқастан соңғы денсаулықты қалпына келтіру шаралары қазіргі күндері мемлекеттік деңгейдегі мәселелердің қатарында.
Қуаныш ЖОЛЫМБЕТ,
«Семей таңы»
