Орта мектеп оқушыларының арасында өтетін республикалық Абай оқулары байқауына қатысушылар Семейге келді. Жыл сайынғы «Абай оқулары» байқауы оқушылар арасында Абай мен Шәкәрімнің шығармашылығын насихаттау мақсатында өткізіліп келеді. Республикалық Абай оқулары – жас таланттардың қанаттарын қатайтып, талабын шыңдайтын шығармашылық мектеп.
Байқауға Қазақстанның барлық облыстарынан 23 команда, 66 оқушы қатысады. Олар Абай мен Шәкәрім шығармаларын мәнерлеп оқу және өз өлеңдері мен музыкалық туындыларын орындау аталымдары бойынша білім жарыстырады. Байқау Жидебайдағы Абай мен Шәкәрім мұражай кешенінде өткізіледі. Осыған орай, қаламызға келген байқау үміткерлері шаһардағы Абай ескерткішіне гүл шоқтарын қойды. Айтулы шараға ҚР Білім және ғылым министрлігі Орта білім департаментінің өкілі Роза Баттал, жоғары оқу орындарының оқытушылары, ақын-жазушылар, құрметті қонақтар қатысты. Шара барысында алғаш болып сөз алған Семей қаласы әкімінің орынбасары Зәуреш Исабаева келген қонақтарға жылы лебізін білдірді.
— Құрметті қала қонақтары, қымбатты 15-ші республикалық Абай оқуларына қатысушы жас өркен. Ең бірінші, баршаңызды қасиетті ұлылар мекені Абай өмірге келген, өмір сүрген, өлмес туындыларын өмірге алып келген қасиетті Семей жеріне қош келдіңіздер! Баршаңызды қала әкімі Айбек Мүталапханұлы атынан, өз атымнан бүгінгі поэзия тойымен, бүгінгі білім мерекесімен, Абай мен Шәкәрім жырлары салтанат құрған мереке күнімен құттықтаймын. Елбасымыз Нұрсұлтан Әбішұлы Назарбаев: «Абай — біздің ұлттық ұранымыз болуы керек. Абайды таныту арқылы біз Қазақстанды әлемге танытамыз. Менің бабаларым мен ертеңгі ұрпағыма Абайдан артық, Абайдан ұлы, Абайдан киелі ұғым болмауға тиіс»,-деп ерекше атап көрсеткен болатын. Абай — туған халқының, болашақ ұрпақтың өнегелі тәрбиешісі, асқар тауы, қайнар бұлағы, ана тілінің шешендік бастауы, қамқор бабасы. Абай мерейі — халық мерейі болып, Абай биіктеген сайын, қазақ та биіктей береді. Сол биіктен көз жазбау — сіз бен біздің парызымыз, — деді Зәуреш Рамазанқызы. — Жыл сайын Абай оқуларына қатысушы жас дарындардың санының көбейуі бізді қатты қуантады. Абай мен Шәкәрімнің 300-400 өлеңін және қара сөздерін жатқа оқу оқушының поэзияға деген сүйіспеншілігін арттырып, ойлау қабілетін жетілдіреді. Сондай-ақ, өмірге деген көзқарастарын қалыптастырады. Бұл біздің мәңгілік еліміздің үміт артар болашақ жастарының үлкен жетістігі. Қымбатты жас өркен! Абай мен Шәкәрім сөздерін жаттап, сырына үңілген бүгінгі 15-ші Абай оқуларына байтақ Қазақстанның түпкір-түпкірінен келіп тұрған сендер- еліміздің алтын ұрпағы, дарынды өркенісіңдер. Ұлылардан ұлағат іздеген баланың жаны жайсаң, жақсы азамат болып өсетініне біз кәміл сенеміз. Ұлы Абайдың рухани мұрасынан сусындап жүргендерің болашақ өмірлеріңе сәуле болсын. Өздеріңе артылған үміт ақталсын дегім келеді. Өскелең ұрпаққа өнегесі мол шараның өтуіне атсалысып, еліміздің түпкір-түпкірінен келіп отырған ұстаздарға алғысымызды білдіремін. Барша үміткерлерге Абай мен Шәкәрім аталардың мұрасы бойларына дарып, олардың болашақта қазақ елінің биіктен көрінуіне атсалысуына тілектеспін,-деп сөзін аяқтады.
{jcomments on}Мерекелік жиынға қатысқан өрендердің барлығы да – өз облысында өткен сайыста жүзден жүйрік оза шыққандар. Биылғы байқаудың өзіндік ерекшеліктерінің бірі – оның аумағының кеңейгендігінде болып отыр. Бір ғана облыстың өзінен бірнеше команданың қатысуы — жыл өткен сайын бұл байқауға қатысушылар санының арта түскенінің дәлелі бола алады.
Асан Мырзаханов,
«Семей таңы»
