21 желтоқсан Ф.М.Достоевскийдің әдеби-мемориалдық музейінде Руслан Шақабаевтың графикалық жұмыстарының жеке көрмесі ашылды. «Терезелер» атты көрме ескі Семейге арналған. Қарындашпен жеңіл салынған жұмыстардан көбіне бір жарым ғасырдан астам ескірген үйлердің сол келбетін сақталғаны байқалады. Ескі үйлерде бірнеше ұрпақтың өмірі сақталған, содан болар әр суреттің өз тарихы бар сияқты суретшінің жұмысындағы әрбір ғимарат жанды болып көрінеді.
Дана ТАЛҒАТБЕК,
«Семей таңы»
Көрмеге жиналған қала тұрғындарына музей қызметкері Алла Белякина бұл көрме бірнеше нәрсені басқа қырынан тануға мүмкіндік беретінін атап өтті.
— Руслан Шақабаевтың графикалық жұмыстар көрмесіне қош келдіңіздер! Бүгінгі көрменің арқасында біз бірнеше нәрсені жаңа қырынан ашамыз. Біріншіден, барлығы Русланды журналист ретінде танып, бүгінгі күнге дейін оның балалар көркемсурет мектебінің, педагогикалық институттың көркемсурет және графика факультетінің түлегі екенін, сондай-ақ бірнеше жыл №6 гимназияда сурет мұғалімі болып жұмыс істегенін көпшілігі біле бермейді. Бүгін Руслан жаңа жағынан ашылатыны анық. Биылғы жылдан бастап ол әлеуметтік желілерде өзінің кейбір жұмыстарын жариялағанымен, суреттері әлі ашылмаған сыр болып келді. Екінші жаңалық, кейінгі жылдары біз ескі үйлер мен қаламыздың ескі аудандарын бейнелейтін суретшілердің туындыларын көріп келеміз. Біз әртүрлі картиналарды, академиялық, классикалық немесе еркін түрде боялған суреттерді көрдік. Бірақ, ескі қаланы Руслан сияқты әлі ешкім салған жоқ деп ойлаймын. Барлық суреттерден соншалықты жайлылық пен жылулыққа толы жанды өмір көрінеді, оларға таңданыспен, қуанышпен қарамау мүмкін емес. Біздің қаланы осылай бейнелеу бұл шығармашылық жаңалық дер едім. Бұл көрме барлықтарыңызды қызықтырып, жағымды сезімдер қалдырады деген үміттеміз, — деді Алла Белякина.
Автор үйлердің сыртқы келбетін суреттеп қана қоймай, бұрынғы қала туралы естеліктерді оятып, өз туындылары арқылы Семейдің сырт келбетіне нәзіктік, сағыныш сезімін бере білген. Оның туындыларынан ерекше жайлы жылулық сезіледі.
— Мен бір кездері Татар слободасы, ал қазір Таткрай аталатын ауданда тұрамын. Өмір бойы осы көшелермен, бұрыннан таныс үйлердің жанынан жүріп өткеніммен, ересек кезімде ғана сол үйлердің өзінде бар сұлулық жайлы ойлана бастадым, — деп Руслан Шақабаев Семей қаласының ескі аудандары арқылы қала пейзаждарын дәл бейнелеуге деген ұмтылысын осылай түсіндіреді.
Көрме себептен себепсіз «Терезелер» деп аталмаған. Егер біз «адамның көзі – жанның айнасы» десек, онда кез-келген үйдің айнасы – бұл терезелер. Автор әр жұмысты кез-келген үйдің осы негізгі бөлігін салудан бастағанын айтады. Сондықтан көрмеде суреттер уақытша терезелердің ішінде орналасқан. Ескі, сарғайған перделердің артында әртүрлі өмір көрінеді – бір жерде иесі тоқуды кейінге қалдырды, бір жерде терезеге кептірілген гүл бұтақтары қойылған, бір жерде шам жанып тұр, ал бір жерде көзілдірік буланып кетпес үшін жақтаулардың арасында тұр.
Көрмеге суретшінің биылғы жылдың алты айында салынған 58 жұмысы қойылды. Олар үш мезгілді, жаз, күз және қыс мезгілдерінен сыр шертеді. Ескі қаланың бұл пейзаждар циклі – кәсіби журналистің шығармашылық болмысының көрінісі. Руслан Шақабаев 20 жылдан бері медиа саласында еңбек етіп келеді.
— Өкінішке қарай, соңғы жылдары Семейде ескі ғимараттар тез жойылып барады. Біз, журналистер, бүгінде тым болмағанда бұзылып бара жатқан бір үйді қорғап, сақтап қалғанымыз есімде жоқ. Соңғы 20 жылда бірде-біреуін қорғай алмадық. Үйлер із-түзсіз жоғалып кетеді. Сондықтан мен олардың кем дегенде суреттерде қалғанын қалаймын, — деп айтады Руслан.
Көрме Ф.М.Достоевскийдің әдеби-мемориалдық музейінде 14 қаңтарға дейін барша көрермендер үшін ашық.
