Жылдағы дәстүр бойынша аудан әкімінің бүлдіршіндерге арналған Жаңа жылдық шыршасы өтіп, шараға 90-ға жуық балғын қатысты. Аудандық мәдениет үйінде өткен Жаңа жылдық мерекелік шара балаларға қызықты мультфильм көрсетуден басталды. Аудан мектептеріндегі білім сайысының жүйріктері, талантты да дарынды оқушылар мен көп балалы және аз қамтылған отбасында тәрбиеленіп жатқан балалардың бас қосқан қуанышына аудан әкімі Жарқынбек Байсабыров ортақтасып, бүлдіршіндерді Жаңа жыл мерекесімен құттықтады.
— Балалар – біздің болашағымыз, еліміздің ертеңі болып табылатын өздерің үшін өңірде айтарлықтай ауқымды шаралар атқарылып жатыр. Болашақтарың жарқын, келешектерің кемел болсын, әрбір отбасының бақыты мен қуанышы да өздерің. Әрқашан оқуда үздік болып, сабақтарыңды жақсы оқып, ата-аналарыңды қуантыңдар. Зерделі де зерек, білімді де білікті болыңыздар! Бүгінде жасампаз істердің барлығы сіздердің жарқын болашақтарыңыз үшін жасалуда. Жаңа жыл мол қуанышымен келіп, асқақ армандарыңыз орындалсын! — деп мерекелік лебізін білдірді аудан басшысы.
Әкім шыршасында Аяз ата, Ақша қар және түрлі ертегі кейіпкерлері жиналғандардың көңілін серпілтті. Жасыл шырша айналасындағы балалардың балбұл жанған жүздерінен мерекенің шаттыққа толы кереметін аңғарасыз. Ертегі әлеміндегі әсем көріністер, көз тартарлықтай безендірілген жасыл шырша айналасындағы әр түрлі кейіпкерлер, сахна төріндегі балалардың көңілін көтерген ғажайыпқа толы қойылым музыкалық композициямен өріліп, дүбірлі думанға айналды.
Аудандық мәслихат хатшысы Мейірхан Оспанбаев үздік оқып, жеңімпаз атанып жүрген жас өрендерге Абай облыстық мәслихатының Алғыс хаттары мен Жаңа жылдық сыйлықтарын тапсырды. Мерекелік басқосудан кейін балаларға мерекелік дастарқан жайылып, аудан әкімі атынан естелік сыйлықтар үлестірілді.
Сондай-ақ аудан әкімі Жарқынбек Байсабыров Абай атындағы көп салалы мектеп-гимназиясы жанындағы интернат оқушыларының Жаңа жылдық кешіне де қатысты. Бүгінде мектеп интернатында ауданның ауылдық округтерінен келіп тұратын 40 оқушы бар. Интернат оқушылары да жаңа жылдық мерекені көтеріңкі көңіл-күймен қарсы алып, жасыл шыршаны көз тартарлықтай безендірген. Аяз Ата мен Ақша қарды ортаға алып, мерекелік шараның көркін қыздырған интернат тәрбиешілері мен оқушылары ән-жырдан шашу шашып, би билеп, өнерлерін ортаға салды.
Балалардың мерекелік шарасына арнайы келген аудан әкімі өзінің жүрекжарды лебізін білдіріп, Жаңа жыл табысы мен жетістігі мол жыл болуын, оқуды жақсы оқып, тәртіпті де тәрбиелі оқушылар қатарынан көрінуге тілектестігін айтып, құттықтауымен бөлісті. Интернат оқушыларына кеш соңында аудан әкімінің ең тәтті сыйы торт ұсынылып, жаңа жылдық сыйлықтар үлестірілді.
Кәусар Арықханқызы
«Семей таңы»
