Жарма ауданында 2025 жылға инфрақұрылымды дамытуға бағытталған 15 ірі және орта жоба іске асырылмақ. Бұл бастамалар негізінен сумен жабдықтау, спорт және мәдени нысандар салу, балалар алаңдарын орнату, сондай-ақ елді мекендерді абаттандыруды қамтиды. Атап айтқанда, Қалбатау, Шар қалалары мен Жаңғызтөбе, Сұлусары, Әуезов кенттерінде бірқатар маңызды жобалар қолға алынып отыр.
Сумен қамту бойынша Қалбатау, Жаңғызтөбе және Сұлусары елді мекендеріндегі желілерді қайта жаңарту жоспарланған. Бұл мақсатқа жалпы 613,1 млн теңге бөлінді.
Спорт инфрақұрылымын дамыту бағытында Қалбатау және Шар қалаларында жүзу бассейндері, стадион мен спорт модульдері, сондай-ақ шағын футбол және воркаут алаңдары бой көтермек. Сонымен қатар Шар қаласындағы Мәдениет үйі күрделі жөндеуден өтеді. Осы жобалар аясында миллиард теңгеден астам қаражат қарастырылған.
Абаттандыру мен балалар алаңдарын салу да назардан тыс қалған жоқ. Шар қаласы мен Әуезов кентінде жаңа балалар алаңдары бой көтереді. Теміржолшылар сквері абаттандырылып, Қалбатау ауылында автотұрақ пен тротуар орнатылады.
Жобалардың кейбірі бойынша конкурс жариялау кезеңінде болса, енді бірі жобалық-сметалық құжаттама сатысында. Қазіргі таңда құрылыс жұмыстарының көпшілігі 2025 жылдың екінші және үшінші тоқсандарына жоспарланған.
Жарма ауданының әкімі бұл жобалардың кезең-кезеңімен жүзеге асырылып, аудан тұрғындарының өмір сапасын арттыруға елеулі үлес қосатынын атап өтті.
Баяндамасынан соң аудан әкімі БАҚ өкілдері сауалдарына жауап берді. Атап айтқанда, журналистер Жарма-Семей бағытында автобус іске қосу, жедел-жәрдем көліктерінің санын арттыру, ауылдарды интернетпен қамту, балалар ойын алаңдарын салу, ауыл шаруашылығы өндірісін дамыту және ауданға инвесторлар тарту бойынша сауалдарын қойды.
Жалпы алғанда, Жарма ауданы 2024 жылы тұрақты даму бағытын сақтады. Алдағы уақытта да аудан экономикасын әртараптандыру, инвестициялық жобаларды іске асыру және халықтың өмір сүру сапасын арттыру негізгі басымдықтардың бірі болмақ.
