Кеше Абай облысының «Қоғамдық келісім» мекемесінде Қазақстан Республикасы Президентінің Жолдауында айқындалған басым бағыттарды талқылауға арналған диалог алаңы өтті. Кездесуге этномәдени бірлестіктердің жетекшілері мен өкілдері, «Әділет» саяси партиясы Семей қалалық филиалының төрағасы Айдос Төлеуханов және мекеме қызметкерлері қатысты.
Басқосудың негізгі мақсаты – Мемлекет басшысының Жолдауында белгіленген міндеттерді талқылау, олардың өңірлік деңгейде жүзеге асырылу жолдарын қарастыру және азаматтық қоғам өкілдерінің пікірлері мен ұсыныстарын тыңдау.
Кездесу барысында жасанды интеллект пен цифрландыруды дамыту, жаңа технологиялардың қоғам өміріне ықпалы, сондай-ақ қоғамдық келісім мен этносаралық татулықты нығайту мәселелеріне ерекше назар аударылды.
Сонымен қатар жастардың қоғамдық өмірдегі рөліне, олардың азаматтық белсенділігін арттыруға және отансүйгіштік құндылықтарды қалыптастыруға мән берілді. Жас ұрпақты қолдау, оның әлеуетін дамытуға жағдай жасау, бастамаларын ынталандыру және қоғамдық-саяси үдерістерге белсенді қатысуына мүмкіндік беру мәселелері талқыланды. Сондай-ақ жастардың ел болашағына деген жауапкершілігін арттырып, оларды қоғамдық келісім мен бірлікті нығайту ісіне тартудың маңыздылығы атап өтілді.
Этномәдени бірлестіктердің жетекшілері мен өкілдері Жолдауда айқындалған басымдықтарды өңірде іске асыруға қатысты ой-пікірлері мен ұсыныстарын ортаға салды. Бұдан бөлек, қоғамдық бастамаларды қолдау және мәдениетаралық байланысты дамыту мәселелері де сөз болды.
Абай облысындағы этномәдени бірлестіктер өңірдің қоғамдық өміріне белсенді араласып, ұлттық мәдениеттер мен дәстүрлерді дәріптеу, түрлі этнос өкілдері арасындағы достық пен өзара түсіністікті нығайту бағытында жүйелі жұмыс жүргізіп келеді. Олардың қызметі ортақ азаматтық құндылықтарды қалыптастыруға және ел бірлігін бекемдеуге бағытталған.
Диалог алаңы ашық әрі сындарлы пікір алмасу форматында өтіп, өзекті мәселелерді талқылауға және алдағы ынтымақтастық бағыттарын айқындауға мүмкіндік берді.
Кездесу қорытындысында қоғамдық келісім мен этносаралық татулықты сақтау мемлекеттік органдар мен азаматтық қоғам институттарының ортақ жауапкершілігі екені атап өтілді. Өйткені ел бірлігі – тұрақты дамудың берік негізі, ал оны нығайту – әрбір азаматтың ортақ міндеті.
