Семей қаласында жалпы ұзындығы 55 шақырымдық автомобиль жолдарына орташа жөндеу жұмыстарын жүргізу жоспарлануда. Қала шетінде жалпы ұзындығы 4 шақырым болатын жаяу жүргіншілер жолы да күрделі жөндеуден өтеді.
Биыл Семей қаласының инфрақұрылымын дамытуға баса назар аударылмақ. Семей қаласы әкімдігі баспасөз қызметінің мәліметінше, биыл көшелерді кеңейту бойынша 4 жоба әзірленуде. Оның ішінде Қаржаубайұлы көшесін Жангелдин көшесінен Энергетик кентіне бұрылысқа дейін, Шугаев көшесін Құтжанов көшесінен Қабылбаев көшесіне дейін, Шәкәрім даңғылын Дулатов көшесінен Жамақаев көшесіне дейін, Құтжанов көшесін Шугаев көшесінен Гагарин көшесіне дейін кеңейту бойынша күрделі жөндеу жұмыстары жүргізетін болады. Сонымен қатар қала шетінде жалпы ұзындығы 4 шақырым болатын жаяу жүргіншілер жолы күрделі жөндеуден өтеді.
Семей қаласына қарасты ауылдардың жолдарын жөндеуге де көңіл бөлініп отыр. Биыл жалпы ұзындығы 13 шақырым болатын 5 ауылға кірме жолдарды орташа жөндеуден өткізу көзделіп отыр. Нақтылай айтсақ, Қыземшек, Кіші Ақтөбе, Верхнее-Березовский, Жарқын, Шаған ауылдарына кірме жолдар жөндеуден өтеді. «Ауыл — Ел бесігі» бағдарламасы аясында Көкентау ауылдық округінің кентішілік жолдарын орташа жөндеу жұмыстарын жүргізу жоспарланған.
«СТ»-ақпарат
