ҚАЗАҚ ӘНІНІҢ АҚ БҰЛАҒЫ
Ол ән салғанда бүкіл қазақ даласы тебіренетін. Еш қоспасыз мөп-мөлдір, сырлы да сұлу, еркін де ерке сазды әуен… Жүректің ең терең иірімдерін қозғайды, ең ізгі сезімдерін оятады. Әуе толқынынан төгілген сезімге толы әндерімен өз тыңдарманының жадында мәңгіге қала білді. Ол — исі қазаққа «Ақ бұлақ» әнімен танымал болған әнші-композитор, ақын, Қазақстанның еңбек сіңірген әртісі, жерлесіміз Болат Сыбанов. Биыл дарынды тұлғаның туғанына 85 жыл толады.
Зарина КӘП
«Семей таңы»
Болат Сыбановтың мерейтойына орай, қалалық өлкетану музейінде әншінің өнерін ұлықтау мақсатында «Қазақ әнінің ақ бұлағы» атты еске алу кеші өтті. Тағылымды іс-шараға Абай облысы Мәдениет және тілдерді дамыту, архив ісі басқармасының басшысы Айдар Ибраев, әншінің жары Үміт Сыбанова мен балалары, үзеңгілес достары, мәдени мекемелердің қызметкерлері және қала тұрғындары қатысты.
Кешке қатысушылар шағын симфониялық оркестрдің орындауындағы әуезді әнге еліте жүріп композитордың музей қорында сақталған жәдігерлері қойылған көрмені тамашалады.
— Құрметті қонақтар! Бүгін қазақтың маңдайына біткен жарық жұлдызы, жез таңдай әнші, талантты актер Болат Сыбановтың шығармашылығына арналған жиында бас қосып отырғанымызға қуаныштымын. Болат ағамыздың музыка саласына, өнер саласына сіңірген еңбегі өлшеусіз. Алайда нағыз шәкірт тәрбиелеп, ортамызда марқайып отырар шағында өмірден өтіп кетті. Бүгінде дарынды тұлғаның төккен тері ақталып, артында қалған елі еске алып, ұлықтап жатыр. Бұл шараны ұйымдастырудағы мақсат та осы деп ойлаймын. Ағамыздың отын өшірмей отырған аяулы жары Үміт апайымызға алғысымыз шексіз. Отбасына ұзақ ғұмыр тілеймін,- деді Абай облысының Мәдениет және тілдерді дамыту, архив ісі бөлімінің басшысы Айдар Маратұлы.
Айдар Маратұлы Үміт Сыбановаға облыстық басқарма атынан алғыс хат табыс етіп, сый-сияпат жасады.
— Бүгінде, Болат тірі болса, 85 жас мерейтойын бәріміз бірге ән салып тұрып қарсы алар едік. Амал нешік, 60 жасында дүниеден озды. Екеуіміз жаңа жылдық кеште танысып, 1967 жылы отау құрған едік. Құдай берген үш баламыз бар. Бүгінгі шараға бірі келсе, бірі келе алмады. Осы шараның ұйымдастырушыларына алғысым шексіз. Жыл сайын ағаларын еске алып, кеш өткізіп тұрады. Сіздердің арқаларыңызда Болаттың аты өшпейді деп білемін,- деді әншінің зайыбы Үміт Сыбанова.
Болат Күнтуұлы бұрынғы Семей облысы Жаңасемей ауданына қарасты Изатолла ауылында дүниеге келген. Он жасынан ауыл арасындағы той-думанда ән салып, әнші атанады. Арнайы музыкалық білімі болмаса да, домбыра, фортепиано, баянда жақсы ойнаған. Оның табысты музыкалық шығармашылығының бүгінге жеткен басты айғағының бірі — «Мелодия» фирмасы шығарған күйтабақ. Әншінің орындауындағы «Ақ бұлақ», «Таң самалы», «Ғашықтар термесі», «Жан ана», «Әке туралы» сынды әсем сазды туындылары бүкіл қазақ халқына ғана емес, Моңғолия, Қытай елдеріне де танымал.
Б.Сыбанов еңбек жолын 1957 жылы Абай атындағы қазақ драма театрында актер болып бастаған. Біраз уақыт Алматы филармониясында қызмет атқарды. Кейін Семей қаласына оралып, өмірінің соңына дейін туған сахнасында еңбек етті. Өзінің театрдағы шығармашылық жолында Болат Сыбанов 100-ден астам көрнекті образды сомдаған.
Кеш барысында әншінің замандастары, шәкірттері Болат Сыбанов жайлы естеліктерін бөлісіп, қызықты сәттері туралы әңгімеледі. Ал Әміре Қашаубаев атындағы мемлекеттік филармонияның әншілері Болат Күнтуұлының репертуарындағы әндерді орындап, кешке жиналған қауымды ерекше әсерге бөледі.
