Жаңару мен жаңғырудың бастамасы
ҚР Парламенті — елдің заң шығару қызметiн жүзеге асыратын ең жоғарғы өкiлдiктi орган болып табылады.
Бүгін Мемлекет басшысы Қасым-Жомарт Тоқаев Конституцияның 86-бабының 5-тармағына сәйкес, барлық деңгейдегі мәслихаттардың өкілеттігін мерзімінен бұрын тоқтатым, Парламент Мәжілісі және мәслихат депутаттарының кезектен тыс сайлауын өткізу туралы мәлімдеме жасады. Осылайша жаңа Мәжілістің кезектен тыс сайлауы 2023 жылғы 19 наурызға бекітілді.
Алдағы уақыттағы Мәжіліс депутаттарының 70 пайызы партиялық тізім арқылы, ал қалған 30 пайызы бір мандатты округтерден сайланады. Депутаттардың 50 пайызы бір мандаттық жүйе арқылы, 50 пайызы партиялық тізім бойынша өтеді. Ал аудан және облыстық маңызы бар қалалардағы мәслихат сайлауында азаматтар бір мандатты округтерден шыққан кандидаттарға дауыс береді. Сондай-ақ, айта кету керек, былтырғы жылы Конституциялық реформа аясында саяси партияларды тіркеу рәсімі жеңілдетілді, партия мүшелерінің санына қатысты талап өзгерді, сайлау бюллетеніне «бәріне қарсымын» деген бағанның енгізілуі және тағы басқалары. Демократиялық өзгерістердің сипатын айтсақ, енді Мәжіліс пен мәслихаттар жаңа үлгі бойынша жасақталады, сайлаушылардың мүддесі жалпыұлттық және аймақтық деңгейде толық қорғалады. Бұндай жаңа өзгерістер халық арасында соңғы уақыттарда көп айтылып жүрген әділетті жаңа Қазақстанның дамуы бағытындағы жаңару мен жаңғырудың жолы болмақ.
Мұхтар АБДИКАКИМОВ,
Семей қаласының
Шәкәрім атындағы университеті КеАҚ
«Әлеуметтік мониторинг және болжау орталығының»
бас маманы, «Тарих және құқық» кафедрасының аға оқытушысы, әлеуметтану ғылымының PhD.
