Семей қаласының әкімі Нұрбол Нұрсағатовтың халықпен кезекті кездесуі Шығыс, Восход, Водный кенттерінде жалғасты. Шаһар басшысы 2022 жылы атқарылған жұмыстар туралы тұрғындар алдында есеп беріп, алдағы жоспарлар жайлы баяндады.
Зарина КӘП
«Семей таңы»
Есеп беру жиындарына мекемелер мен бөлімдердің басшылары, құқық қорғау органдарының қызметкерлері, жергілікті БАҚ өкілдері қатысты.
Айта кетелік, бұл қала әкімінің осы аумақтағы тұрғындармен екінші рет кездесуі. Бұған дейін кенттегі белсенділермен бірнеше рет жиындар өткізіп, ұсыныстарын тыңдаған болатын. Сондай-ақ апта сайын коммуналдық кәсіпорын өкілдері және бөлім басшыларымен бірлесіп, аумақтағы мәселелерді егжей-тегжейлі талдау нәтижесінде бірнеше жобалар қабылданған болатын.
Қала әкімнің айтуынша, биыл Семейде облыс орталығы ретінде әлеуметтік-экономикалық, инфрақұрылымдық дамуы үшін ауқымды жұмыстар жоспарланған.
— Биыл бірқатар нақты жобаларды жүзеге асыруды көздеп отырмыз. Қалада жалпы ұзындығы 55 шақырым болатын 40 көше күрделі жөндеуден өтетін болады. Оның ішінде Шығыс кентіндегі Көшкінбаева көшесінде 1,6 шақырым болатын асфальт жол салуды жоспарлап отырмыз. Сондай-ақ Өскемен көшесінен Инновациялық-технологиялық колледжіне дейінгі жол учаскесіне орташа жөндеу жүргізіледі. Водный кентіндегі №34 орта мектепке баратын жол күрделі жөндеуден өтеді. Водный мен Восход кенттерінде екі шақырымнан астам жолдар грейдерленіп, қиыршық тас төселеді,- деді қала әкімі Нұрбол Төлегенұлы.
Кездесуде бүгінде өзекті болып тұрған қоғамдық көлік, ТҮКШ, сондай-ақ басқа да әлеуметтік маңызы бар салалардағы мәселелер талқыланды. Шығыс сол жақ саяжайының тұрғындары электр энергиясына төлейтін тарифтің қымбаттығына шағымданды.
— Бұл мәселені оңтайлы шешу мақсатында тиісті органдарда иесіз желілерді тіркеу үшін қажетті дайындық жүргіздік. Құжаттаманы дайындау және конкурстық рәсімдерді өткізу үшін ақшалай қаражат бөлінді. Конкурстық рәсімдер аяқталғаннан кейін тарифтерді төмендету бойынша шаралар қабылдаймыз,- деді қала әкімі Нұрбол Нұрсағатов.
Шаһар басшысы бұл аумақтардағы білім беру мекемелерінің мәселесі де шешілетіні айтты.
— Сіздерді алаңдатып отырған тағы бір мәселе №№12, 34, 47 мектептерде оқушы орнының тапшылығы екенін білемін. Жаз айында бұл мектептерде күрделі жөндеу жүргізіледі. Водный кентінде «Жайлы мектеп» жобасы аясында 600 орындық мектептің құрылысы басталады. Мектеп ғимараты салынатын жер телімі анықталды,- деп атап өтті Нұрбол Нұрсағатов. Қала әкімі кенттерде әлеуметтік нысандар мен мектептердің жанында бейнебақылау камералары мен сыртқы жарықтандыру орнатылатынын, осы аумақтарда 8 жаңа металл аялдама павильондарын салу жоспарланып отырғанын айтты. Сондай-ақ әкім алдағы 2 жылда іске асыру көзделген 20 жоба әзірленгенін, Семей қаласына қарасты ауылдарда ауыз сумен қамтамасыз ету үшін 11 жоба іске асырылатынын да жеткізді. — Аталған елді мекендерде ұзындығы 70 шақырым болатын су құбырын салу жұмыстары басталады. Ал Шығыс кентіндегі Аюченко және Целинная көшелерінде су құбыры желілері жөнделеді. Шығыс кентіндегі Аюченко көшесіндегі кәріз желілерін қалалық әкімдік, «Семей Водоканал» мекемесіне сенімгерлік басқаруға бере отырып, өз теңгеріміне алады,- деді шаһар басшысы.
Жиынды қорытындылай келе қала әкімі көтерілген барлық мәселелер маңызды екенін және кезең-кезеңімен шешуді талап ететінін атап өтіп, аталған барлық проблемалар хаттамаға енгізілгенін, оған сәйкес іс-шаралар жоспары әзірленетінін айтты. Атқарылған жұмыстың қорытындылары туралы сайтта, сондай-ақ Семей қаласы әкімдігінің әлеуметтік желілердегі ресми аккаунттарында хабарланатын болады.
