Әйгерім Сәрсенғали,
«Семей таңы»
Өткен жұма күні қалалық әкімдікте терроризмге қарсы күрес комиссиясының отырысы өтті. Жиынға қала әкімі Айбек Кәрімов және комиссия мүшелері қатысты. Жиынның мақсаты — үстіміздегі жылдың шілде айында өз жұмысын бастаған комиссияның жұмыс барысы, терроризмге қарсы әрекеттерді күшейту, нысандарды лаңкестік әрекеттерден қорғау және 2013-2017 жылдарға арналған Қазақстан Республикасында терроризм мен діни экстремизмге қарсы бекітілген мемлекеттік бағдарламаның жүзеге асу барысын талқылау.
ШҚО Семей өңірі арнайы күзетшілер қызметі бастығының орынбасары Яшар Ертісбаев қазіргі таңда қаламызда 10 нысан қауіпсіздікпен қамтамасыз етілгендігін айтады. Сонымен қатар, біршама нысандар күзет және бейне-бақылау құрылғыларының қарауында екенін де атап өтті. Жоспар бойынша лаңкестікке қарсы алдын алу шараларын қолға алдық деген Семей станциясындағы желілік Ішкі істер басқармасы бастығының орынбасары Ғалым Омарбеков:
-Елбасымыз халыққа Жолдауында қоғам тыныштығын бұзатын тәртіпсіздіктерге ымырасыз күрес жүргізуді тапсырған болатын. Жолдаудағы мақсат-міндеттердің орындалуына, ел болашағы іргетасының қалануына өз үлесін қосу – мемлекеттік қызметкерлердің және жүрегі «елім» деп соққан әрбір азаматтың парызы деп білемін, — деген ол өз бөлімшелерінде Елбасының тапсырмасы бойынша айтарлықтай істердің атқарылып жатқандығына тоқталды.
Сонымен бірге, қаладағы стратегиялық нысандардан өзге, жалпы ел ішіндегі қауіпсіздік мәселелері толықтай бақылауда екендігі, көшелердің жарықтандырылып, арнайы бақылау құрылғылардың орнатылуы да қала тыныштығына қызмет ететіндігі айтылды. Жиынға қатысушы күш – құрылым өкілдері қала мен тұрғындардың алаңсыз болуларына барлық жағдайлардың жасалғандығын атап өтті.
