Өткен жұма күні Семей қаласында ALTEL 4G техникалық орталығы ашылды. Бұл қаладағы ұялы байланыс пен интернет саласының тағы бiр қадам алға жылжығанын көрсетедi. Осы игiлiктi шараның арқасында шаһар тұрғындарына 4G технологияларына негiзделген конвергенттi желi қызметiн қолдану мүмкiндiгi берiлдi. Айтулы шараға қала әкімі Айбек Кәрімов және «АЛТЕЛ» АҚ басқарма төрағасы Мақсұт Сауранбеков қатысты.
«АЛТЕЛ» АҚ Қазақстанда LTE желісінің құрылысын жалғастыруда. Міне, Семей қаласында да LTE желісін пайдалануға енгізді, — деген «АЛТЕЛ» АҚ басқарма төрағасы Мақсұт Сауранбеков, — Семей қаласында LTE желісін пайдалануды бастаумен жоғары жылдамдықтағы мобильді 4G интернетінің қызметі Қазақстанның 7 миллионнан астам, яғни еліміздің 41% тұрғынына қолжетімді болды. 2014 жылдың қыркүйек айындағы жағдай бойынша ALTEL-дің LTE желісі Қазақстанның ірі 17 қаласында ойдағыдай пайдаланылып келеді.
Шара барысында сөз алған қала әкімі Айбек Кәрімов Семей қаласына инвестиция салып отырған компания өкілдеріне өз ризашылығын білдірді. Сонымен қатар, жаңа технология арқылы жедел әрі сапалы ақпарат алуға болатынын атап өтті.
— Семей қаласына ауқымды инвестиция салып отырғандарыңызға қуаныштымыз. Бұл көпфункционалды қызмет түрі. Әсіресе, сіздердің технологияларыңыз арқылы құқықбұзушылық пен қылмыстың алдын алу үшін бақылап отыра аламыз. Сондықтан қалаға келіп жұмыстарыңызды бастап, Семей қаласын ең маңызды стратегиялық аумақ санағандарыңыз үшін қуаныштымыз, — деген қала әкімі, – Семей қазіргі күні Шығыс Қазақстан облысындағы ең ірі аумақ саналады. Біздің есебімізше, қала тұрғындарының саны 350 мың адамнан асты. Қаланың болашақ дамуы әлі алда. Айта кетуіміз керек, қала экономикасы нақты шағын және орта бизнеске құрылған. Сондықтан біздің кәсіпкерлеріміз сіздердің технологияларыңызбен жұмыс жасауға үлкен мүмкіндік алып отыр. Бұл өңір бизнесін дамытуға жасалған жақсы жағдай, — деді Айбек Мүталапханұлы.
4G желісі Қазақстанда алғаш рет 2012 жылы Алматы және Астана қалаларында жұмысын бастады. Бір жылдан кейін желі Ақтау, Ақтөбе, Атырау, Есік, Қапшағай, Қарағанды, Қаскелең, Өскемен, Шортанды, Шымкент, Талғар қалаларында, 2014 жылдың шілде айында Тараз және Қызылорда қалаларында пайда болды. Ал осы жылдың соңына дейін 50 мыңнан аса тұрғыны бар тағы он екі қалаға қосылады. Сондай-ақ, алдағы жылдары еліміздің қалған аумақтарында ALTEL 4G/3G/2G желісінің дамуы жалғастырылады.
Асан МЫРЗАХАНОВ, «Семей таңы»
