Ауаның ластануы адам өміріне үлкен қауіп төндіретіні белгілі. Ал Семейдегі күрделі мәселелердің бірі осы ауаның ластануы болып тұр. Абай облысы экология департаменті басшысының орынбасары Мамай Бұтабаевтың қатысуымен өткен баспасөз мәслихатында қала экологиясына айтарлықтай зиян келтіріп отырған «Теплокоммунэнерго» мекемесінің қоршаған ортаға әсері жайында айтылды.
Әйгерім СӘРСЕНҚАЛИ,
«Семей таңы»
— Ауаның ластануы Семейдегі күрделі мәселелердің бірі болып тұр. Қоршаған ортаның ластануына жылу қазандықтарының тигізер залалы мол. Қаланың өзінде 18 жылу қазандығы бар. Ақпан айында қоршаған ортаны қорғау және қадағалау мақсатында «Теплокоммунэнерго» мекемесіне жоспардан тыс тексеру жүргізілді. Тексеріс барысында ластаушы заттар шығарындыларының мөлшері бейорганикалық шаңның ШЖШ нормасынан артық екендігі анықталды,- деді Мамай Бұтабаев. Тексеру нәтижесінде, ҚР Экологиялық кодексі талаптарының бұзылуына байланысты, 3 заң бұзушылық бойынша іс қозғалып, «Теплокоммунэнерго» мекемесіне әкімшілік жаза қолданылған. Нақтылай айтсақ, ауа құрамында ауыр заттардың көптігіне байланысты 7 406 692 теңге, көмірқышқыл газы көлемінің артуына байланысты 115 922 теңге, көмірқышқыл газы мен азот қышқылының көптігіне байланысты 458 042 теңге айыппұл салынған. Алайда мәселе айыппұлмен шешілетін емес. Себебі дәл осы кәсіпорынға өткен жылғы тексеру нәтижесінде екі бап бойынша 900 мың және 7 миллион теңге айыппұл салынған. Биыл да сол олқылықтар қайталанып отыр. — Айыппұл тығырықтан шығудың жолы емес. Ал экологиялық талаптарды сақтау үшін жылу орталықтарында сүзгі орнатылуы тиіс. Қаламызға тағы бір Жылу орталығы қажет. Облыс әкімдігімен бұл мәселе қарастырылып жатыр,- деді Мамай Бұтабаев. «Теплокоммунэнерго» мекемесі өкілдерінің айтуынша, бүгінде сүзгі орнату жұмыстары жүргізіліп жатыр. — Мекемеге қарасты барлық жылу қазандықтарында шаң соратын батареялық циклон орнатылған. Қазіргі таңда «Ғаббасов» жылу қазандығы бір қазандық пен сүзгі орнату үшін қайта жаңғыртылуда. Ал «35 квартал», «103 квартал», «Зооветинститут» қазандықтарында жөндеу жұмыстары жүргізілуде. Жұмыстар жылдың төртінші тоқсанында аяқталады деп жоспарланып отыр,- деді «Теплокоммунэнерго» мекемесінің қоршаған ортаны қорғау бөлімінің басшысы Данияр Тілеубаев. Мекеме өкілінің айтуынша, қала көмірмен жылытылатындықтан, ауаға бөлінетін көмір тозаңының мөлшері көп. Барлық қазандықтарда сүзгі орнатылғанымен, олар тек шаңның 80 пайызын ғана соруға қауқарлы. Ал соңғы орнатылып жатқан сүзгілер ауаны 95 пайызға дейін тазартуға мүмкіндік береді екен. Жалпы, қала экологиясына, «Теплокоммунэнерго» мекемесінен бөлек, Семей цемент зауыты да айтарлықтай зиян келтіретін мекемелер қатарында болған. Департамент басшылығы атап өткендей, зауытта шаңды 99,9 пайыз соратын сүзгі орнатылғандықтан, тексеріс барысында заң бұзушылық анықталмапты. Силикат зауытында да сүзгі орнатылып жатқан көрінеді. Қалай десек те, өндірістің өрге жылжуы мен түрлі тұрмыстық игіліктер қоршаған орта мен экологияға залалын тигізбей тұрмайды. Сондықтан, кәсіпорындарда сүзгі орнатумен бірге, қаланың жеке секторларындағы үйлерді жылытуды қатты отыннан газға алмастыру, жаңа жылу орталығын салу сынды жүйелі шаралар экологиялық жағдайды жақсартуға ықпал етері сөзсіз.
