Абай облысының әкімі «Bike for peace» үкіметтік емес ұйымының делегациясымен кездесті.
Айтолқын САМАТОВА,
«Semeı tańy»
«Bike for Peace» қозғалысының қызметі әлемнің түрлі елдерінде велотурлар аясында саясаткерлермен, қоғаммен, жастармен өткізілетін кездесулері барысында ядролық қарусыз әлемді насихаттауға бағытталған. 1977 жылы қозғалыс құрылғаннан бері 120-дан астам елде 250 велотур ұйымдастырылған.
Кездесу барысында ұйым мүшелері Абай облысымен тығыз ынтымақтастық орнатуға дайын екендіктерін білдірді.
Облыс әкімі Нұрлан Ұранхаев ұйымның әлемдегі бейбітшілікті сақтаудағы ерекше рөлін атап өтті.
– Біздің облыс және оның әкімшілік орталығы Семей қаласы Қазақстанның мәдени, рухани және тарихи орталығы саналды. Мұндай кездесулер жаһандану кезеңінде достық пен дипломатиялық қарым-қатынастарды нығайту үшін өте маңызды. Өздеріңіз білесіздер, Қазақстан — ядролық қарудан өз еркімен бас тартқан алғашқы елдердің бірі. Ал «Bike for рeaсe» қозғалысы — бейбітшілік пен қарусыздану саласындағы белсенді күресуші. Біз сіздердің бейбітшілік саясаттарыңызды жақтаймыз, елімізді халықаралық аренада қолдап отырғандарыңыз үшін алғыс айтамыз, – деді аймақ басшысы.
Нұрлан Ұранхаев өлкеміздің руханияты мен мен мәдениетіне де тоқталды.
– «Ромео мен Джульетта» хикаясын бүкіл әлем біледі, бірақ біздің жерімізде де мұндай оқиғалар болғанын көбі біле бермейді, бұл — Қозы Көрпеш пен Баян сұлудың, сондай-ақ Еңлік пен Кебектің махаббат оқиғасы. Олар шын өмірде болған тарихи тұлғалар,- деді Нұрлан Ұранхаев.
«Bike for peace» ұйымының төрағасы Тюре Нерланд әрқашан бейбітшілік пен жалпы қарусыздану идеяларын жақтайтынын, Қазақстан көптен бері велошерулер үшін қызығушылық тудырып отырған басты елдердің бірі екенін атап өтті.
– Біз Қазақстанға бірнеше рет келіп, нағыз қазақы қонақжайлылықтың куәсі болдық. Бейбітшілік идеялары бүкіл әлемде кеңінен насихатталуы керек және 2045 жылға қарай жалпы ядролық қарусыздануға қол жеткізе аламыз деп үміттенеміз,- деді Тюре Нерланд.
