24 жастағы Олжас Қаныбек Америкада біліп алып жатқан отандастарымыздың бірі. Ол Флорида штатында қарақшылармен бетпе-бет келіп, оларға сыбағасын тарттырып, желіде танымал болып үлгерді. Жерлесіміздің батылдығына америкалық полиция қызметкерлері де таңдай қағыпты. Stan.kz тілшісіне оқиғаның жай-жапсарын баяндаған ол АҚШ-та не істеп жүргенін, елдегі әсері жайлы айтып берді.
Олжас Қаныбек – Түркістан облысы Кентау қаласында 1999 жылы дүниеге келген. Ата-анасы мен екі туған әпкесі Кентауда тұрады. Өзі үйдің кенжесі. АҚШ-тың Флорида штатында авиация саласында білім алады. Мұнда ұшақ басқарып, тәжірибеден өтуге келген. Америкаға келгеніне үш апта болыпты. Отандасымыз америкалықтарды да, қазақстандықтарды да “шулату” ойымда болмады дейді.
«Оқиға 16-ы сәуір күні сағат күндізгі 17:00-дер шамасында болды. Өзіме «Oper App» деген сайттағы жарнама арқылы телефон алуға бардым. Барған кезде қара нәсілді жігіт мені күтіп тұрды. Телефонды ары-бері қарап тұрғанымда, тағы да екі жігіт келді. Қолдарында бір мылтық пен екі тапанша бар. Маған тапаншаларын кезеп, қол сөмкемді беруімді бұйырды. Ішінен тек қана төлқұжатымды алып үлгердім. Олар сөмкені ала салысымен қаша кетті», — дейді АҚШ-тағы жерлесіміз.
Сөзінше, Олжас үшеуін оңайлықпен жібере салғысы келмеген.
«Үшеуі үш жаққа бөлініп кетті. Біреуін қуып жетіп, мылтығын тартып алдым. Мылтықпен оның басынан ұрдым. Қаруды ұрған соң, астыңғы бөлігі сынып кетті. Баукеспе жерге құлаған кезде, ұялы телефоны мен бір-екі заттары қалтасынан түсті. Содан кейін ол қаша жөнелді. Мен жерге түскен заттарын жинап алдым. Екінші рет қайта қуалап, бейне роликтерді түсіруді бастадым. Бірақ өзімнің заттарымды қайтара алмадым.
Артымнан тағы екеуі қайта келіп шабуыл жасайды. Осыны пайдаланып, мен ұстай алған бұзақы да қашып кетті. Артынша шабуылдаған екеуі де ізім-ғайым жоғалды. Олар қайта келген кезде қолдарынан сөмкемді көрмедім. Басымнан тапаншаларымен ұрды. Сол сәтте қаруларын тартып алып, оларға да қарымта соққы жасадым. Олардың ұялы телефондары мен алтын шынжыры, бір мылтық пен тапаншасы қалып қойды», — дейді ол.
Жергілікті полицейлердің хабарлауынша, бұлар ұйымдасқан әккі қылмыскерлер екен.
«Өзім тұратын үйдің иесіне айқайлап, полицейлерді шақыруын сұрадым. Мені жергілікті полиция әуре-сарсаңға салған жоқ. Түсініктеме толтыртып, бөлімшелеріне де сандалтпады. Қағаздарын өздері толтырды. Мен қолымды қойып бердім. Олар дер кезінде әрекет етіп, қылмыс орнынан айғақтарды іздеді. Мен тартып алған заттарды алды.
Олардың түрлері мен дене пішімдерін суреттеп бердім. Оқиғаның қалай болғанына дейін шерифтерге айттым.
Жарақат алғаннан кейін, жедел-жәрдем қызметі де жетті. Сол қолымның ортанғы саусағы біреуінің тісін қағып түсірді. Қатты соққы болған соң, қолымды жарақаттап алыппын. Тіпті Америкада өрт сөндіру мен басқа да қызмет түрлері мұндай кезде келеді екен», — дейді сұхбат беруші.
Дегенмен полиция қызметкерлеріі отандасымызды марапаттап, арнайы сый құрметтерін көрсетпепті.
«Жергілікті бөлімшенің бастығы өз алғысын білдірді. Олардың жарты жұмысын істеп бергенімді айтты. Америкалық коптар мұндайды ешқашан көрмедік дейді. Біз үшін аңыз болып қаласың деді. Осылай ризашылықтарын жеткізіп жатты”, – деп баяндады болған оқиғаны қазақстандық жігіт.
Айтуынша, Алматыда оқығысы келсе де, тағдырдың өзі осында айдап әкелгендей.
“Ағылшын тілін оқуға біліп түстік. Бірақ әлі де үйреніп жүрмін. Қарақшыларды түсірген бейнеде, эмоциядан өзімнің қате айтқан сөздерімді байқадым. Одан да жақсырақ сөйлесем болатын еді», — дейді 24 жастағы жігіт.
Олжас әлеуметтік желі арқылы осы оқиғаны достарына жібергенде жақындарына таратпауын сұраған. Бірақ оның отбасы басқалардан біліп қойса керек.
«Ата-анам байқап жүр деп алаңдаушылық білдірді. Мұндай бұзақылардан аулақ жүр деді. Қазақстанның Сыртқы істер министрлігі мен АҚШ-тағы Қазақстан елшілігі хабарласып, жағдайымды сұрастырған болатын», — дейді отандасымыз.
Оның айтуынша, АҚШ-та бұдан да қауіпті штаттар бар екен.
«Флориданы Америкадағы ең қауіпті штаттардың бірі деп айтсақ болады. Коптар маған қалада күніге атыс, одан кейін адам өлімінің болатынын жеткізді. Содан кейін де жергілікті халық қылмыскерлермен қақтығысқа түспеуге тырысады екен. Сондықтан қарақшылар елді тонап, жеңіл ақшаға үйреніп қалған.
Өзім Американың басқа штаттарында болған жоқпын. Флорида штаты айтарлықтай қымбат. Жатар орнымды, өзімнің компаниям төлеп береді. Екі жарым айға төлейтін қаражатымды да берген. Бірақ оның барлығы баукеспелердің қолында кетті», — дейді ол.
Кейіпкерімізге Америкадағы отандастарымыз да хабарласқан. Нью-Йорктағы қазақ-полицей Димаш Ниязов өз оқырмандарына оқиға туралы бөліскен. Тіпті қылмыстық істі қозғап жатқан полицеймен де сөйлесіпті.
Қазіргі таңда отандасымыз қарақшылардың әлі ұсталмағанын, әзірге еш хабар жоқ екендігін айта кетті.
Қадірәлі САРЫПБЕК
