Абай облысының әкімі Нұрлан Ұранхаев Семей қаласына ресми сапармен келген АҚШ-тың Қазақстандағы Елшісі Дэниел Розенблюммен кездесті. Кездесу барысында өңір басшысы америкалық дипломатқа ілтипат білдіре отырып, Абай облысына инвестициялар тарту үшін барлық жағдайлар жасауға дайын екендігін білдірді.
— Қазақстан мен АҚШ 30 жылдан астам уақыт ішінде саяси, әскери, экономикалық және тағы да басқа салаларда өзара тығыз байланыс орнатты. Жаңадан құрылған Абай облысы шетелдік әріптестермен, соның ішінде америкалық кәсіпорындармен өзара тиімді ынтымақтастықты дамытуға мүдделі. Өңірімізге инвестиция тарту үшін жан-жақты қолдау көрсетуге және қажетті жағдай жасауға дайынбыз, — деді Нұрлан Ұранхаев.
Бүгінгі күні АҚШ — Қазақстанға 62 миллиард доллардан астам инвестиция құйған ірі инвесторлардың бірі. Экономикасы тау-кен өнеркәсібі, өңдеу өнеркәсібі және ауыл шаруашылығы салаларына негізделген.
— Семейге алғаш рет келіп отырмын. Абай облысымен серіктестігімізді жалғастырғымыз келеді. Болашақта Ұлы Абайдың туған жеріне — Қарауыл мен Жидебайға барамын деп үміттенемін. Қазақстан тәуелсіздігінің ең бастапқы кезеңінен бастап АҚШ-тың қолдауына ие болды. Қазақстан ядролық қарудан бас тартып, бейбітшілік көшбасшысына айналды. Соңғы 15 жылда Қазақстанға АҚШ-тан 15 миллиард доллар тікелей инвестиция құйылды, — деді Дэниел Розенблюм.
Айта кетейік, Семей қаласындағы Шәкәрім атындағы университет Арканзас Университетінің жаңғыртылмалы қуат технологияларын ауыл шаруашылығында қолдану туралы бастамасына қосылды.
Еске сала кетейік, Америка Құрама Штаттары 1991 жылдың 25-ші желтоқсанында ең алғашқылардың бірі болып Қазақстан Республикасының тәуелсіздігін мойындады. Ал 1992 жылы АҚШ Алматы қаласында өзінің елшілігін ашып, 2006 жылы оны Астана қаласына ауыстырды. Сонымен қоса АҚШ Семей полигонын жабу мәселесінде Қазақстанды қолдап, 1993 жылы ядролық бомбаларды, қару-жарақ материалдарын және оларды жарақтандыратын инфрақұрылымдарды жоюға көмектесті.
«СТ» — ақпарат
