Семей қаласында Халықаралық музей күні аясында жыл сайын «Музей түні» акциясы дәстүрлі түрде өтеді. Шаһарымыздағы барлық мұражайларда 18 мамыр күні сағат 18:00-де басталған аталмыш мерекеде музей қызметкерлері арнайы әзірлеген бағдарламалары аясында келушілердің назарына ерекше жәдігерлерін, әр түрлі өнер туындыларын ұсынып, қонақтарының көңілінен шығуға тырысты.
Айкөркем МАҚЫШ,
«Semeı tańy»
Аталған шараның мақсаты – музей жәдігерлерін жұртшылық назарына ұсыну арқылы мәдени құндылықтарды, тарихымызды насихаттау.
Облыстық тарихи-өлкетану музейіне келушілер «Көне алтын» көрмесін тамашалады. Бұл көрмеде Шілікті Алтын адамының реконструкциясы, Тарбағатай ауданындағы Елеке сазы мен Аягөз ауданындағы Бозай қорымынан табылған археологиялық олжалар қойылды. Сонымен бірге Үржар ханшайымы да қонақтарды сән-салтанатымен қарсы алды.
Сондай-ақ «Ескі Семей» фотокөрмесі, «Шыны тарихынан» көрмесі, «Қиял әлемі» балалар шығармашылығының көрмесі ұйымдастырылып, қолөнер шеберлерінің жасаған бұйымдарынан жәрмеңке өтті.
Іс-шара басталар алдындағы құттықтау сөзінде облыстық қоғамдық даму басқармасының басшысы Айдар Садырбаев атап өткендей, дәстүрлі «Музей түнінің» маңызды сәттерінің бірі – әр түрлі адамдардың ортақ бір мүддеге бірігуі.
— Біз осындай мерекені бірге өткізуге, тарихи танымымызды кеңейтуге, қызықты адамдармен кездесуге мүмкіндік алғанымызға қуаныштымыз. Өлкетану мұражайы бұл мерекені дәстүрлі түрде жоғары деңгейде ұйымдастырып келеді және бұл жылы да жақсы өтеді деген сенімдемін, — деп атап өтті Айдар Садырбаев.
Биылғы жылы халық қолөнерін, ұлттық ойындарды насихаттауға көп көңіл бөлінуде. Қолөнершілер өздерінің шеберханаларын ашық аспан астында орналастырып, «Қыш құмыра» және «Петроглифтер» тақырыбындағы шеберлік сабақтары аясында керамика дөңгелегі мен ағаш кескіштермен жұмыс істеу дағдыларын керемет меңгергендерін көрсетті. Сондай-ақ музейге келушілер «Тоғызқұмалақ», «Садақ ату», «Асық ату», «Бестас», «Қол күресі», гір көтеру сынды түрлі спорттық ойындарға қатысып, күштерін, мергендіктерін сынауға мүмкіндік алды.
«Музей түні» аясында танымдық викториналар мен фотоға түсу алаңдары ұйымдастырылғанын да айта кеткен жөн. Концерттік бағдарлама да ұсынылып, Әміре Қашаубаев атындағы облыстық филармония мен Қалалық Мәдениет сарайының әртістері, «Шығыс» өңірлік қолбасшылығының әскери оркестрі музей қонақтары алдында өнер көрсетті.
Бұл күні Абайдың «Жидебай — Бөрілі» мемлекеттік музей-қорығында да мәдени-көпшілік шаралар өтті.
Семей қаласындағы мәдениет және өнер мекемелері қызметкерлері арасында «Шәкәрім даналығы» квесті ұйымдастырылды. Ойын барысында қатысушылар музей залдары бойынша тапсырмалар орындап, үздік деп танылған қызметкерлер алғыс хаттармен, Семей қаласы мәдениет және тілдерді дамыту бөлімі тарапынан бағалы сыйлықтарымен марапатталды.
«Музей түнінде» қала тұрғындары мен музей қонақтары үшін Абай мен Шәкәрім шығармашылығына арналған әдеби композиция және Абай монологі көрермендер назарына ұсынылды. Сонымен қатар келушілер Семей қаласы Жастар орталығының концерттік бағдарламасын, қала суретшілерінің пленэрін тамашалап, фотоаймақта суретке түсіп, музей аумағындағы суретшілер салып берген лездеме портреттерге ие болды.
Шара аясында Шәкәрім университеті студенттерінің «Шәкәрім өрнектері» ұлттық киімдер дефилесі көрсетілді. Абай музейіндегі мәдени-көпшілік шараны ұйымдастыруға атсалысқан мәдениет саласының мамандарына алғыс хаттар табыс етілді. Музей қызметкерлері Абай облыстық Мәдениет, тілдерді дамыту және мұрағат ісі басқармасы басшысының алғыс хаттарымен марапатталды.
Музей экспозицияларын тамашалаған көрермендер қатары да көп болды. Абай мен Шәкәрім шығармашылығы жайындағы викторина сұрақтарына жауап берген белсенді қатысушылар сыйлықтармен марапатталды.
Невзоровтар отбасы атындағы бейнелеу өнері музейі жүргізіліп жатқан жөндеу жұмыстарына байланысты Музей түнін онлайн режімде өткізді. Айта кетейік, желтоқсан айында қаламыздағы бірегей музей өзінің 35 жылдық мерейтойын атап өтпек. Қазір музей және оның тарихы, қызметкерлері туралы бірнеше сериядан тұратын фильм әзірленуде. 18 мамыр күні деректі фильмнің алғашқы сериясы жарық көріп, көрерменге жол тартты.
