Абай облысындағы орман өрті әлі ауыздықталмай тұр. Дүйсенбі, 22 мамыр күні түсте Ресей Федерациясының Алтай өлкесіндегі Новенькое ауылының маңында тұтанған өрт желдің ықпалымен Бородулиха ауданындағы Ауыл станциясынан 7 шақырым қашықтықтағы «Семей орманы» мемлекеттік орман табиғи резерваты аумағына жеткен болатын. Абай облысының Төтенше жағдайлар департаменті мен облыс басшылығы бірден тілсіз жауды ауыздықтауға кірісті.
Оқиға орын алған сәттен бастап облыстық жедел штаб құрылып, орман өртін сөндіруге барлық күштер мен құралдар жұмылдырылды. Өрт аумағында 400-ден астам адам мен 100-ге тарта техника, екі тікұшақ жұмыс істеді.
Жағдайды өз бақылауына алған облыс әкімі Нұрлан Ұранхаев сейсенбі күні Бородулиха ауданына барып, орман алқабының үстінен тікұшақпен ұшып өтіп, барлау жасады. Содан кейін өңір басшысы жедел штабта көшпелі кеңес өткізіп, ТЖД басшысы Манарбек Шапағатов пен облыс әкімінің орынбасары Димитрий Гариковтың есептерін тыңдады.
— Мамандар кезекшілік етеді. Сөндіру жұмыстары барлық ошақтарда жүзеге асырылуда. Басты міндет — елді мекендерге жалынның таралуына жол бермей, өртті тезірек сөндіру. Ол үшін жедел штаб тәулік бойы жұмыс істейді. Орман қорына келтірілген залалды өрт толықтай сөндірілген соң есептейміз, — деді облыс әкімі Нұрлан Ұранхаев.
Алғашқы сәтте жақын маңдағы ауылдардың тұрғындарына қауіп төнбегенімен, өрт алаңының ұлғаюына байланысты Березовка ауылының 300-ге жуық тұрғыны қауіпсіз жерге көшірілді.
23 мамырда өртті сөндіруге 2 тікұшақ, жеке құрамның 348 өрт сөндірушісі және 96 техника жұмылдырылған. Ал кеше, 24 мамыр күні таңертең Премьер-министрдің бірінші орынбасары Роман Склярдың төрағалығымен бейнеконференция режимінде жедел штаб отырысы өтіп, Абай облысының әкімі Нұрлан Ұранхаев мән-жайды баяндады.
Аймақ басшысы өрт орнына қайта оралды. Орман өртін облыс басшылығы мен ТЖ қызметтері қатаң бақылауда. Қызыл жалынды сөндіру жұмыстарының нәтижесінде отқа оранған үш ошақтың 2-уі оқшауланып, сөндірілгені жайлы облыс әкімінің орынбасары Димитрий Гариков мәлімдеді.
Үшінші ошақтағы жағдай әлі де күрделі болғандықтан, қосымша күштер мен құралдар тартылды. Өртті сөндіруге 434 адам, 109 өртке қарсы техника және су жинау жүйелері бар екі МИ-8 тікұшағы жіберілді.
— Бүгін бізге Астана, Павлодар, Қарағанды облыстарынан ТЖМ күштері — жеке құрамның 130-ға жуық адамы және 26 өртке қарсы техника көмекке келді. Сағат 11-ге қарай біз Қарағанды облысы мен ҚР Қорғаныс министрлігінен тағы 2 тікұшақ келеді. Бұдан басқа, Қорғаныс министрлігінің әлеуеті қосымша тартылатын болады, бұл оңай өтетін техника, бульдозерлер, біз оларды мемлекеттік қордың аумағын өртке параллель өтетін және 2 магистралды жалғайтын жолдан толығымен бөліп тастау үшін қолданатын боламыз», — деді Димитрий Гариков.
Оқиға орнына Төтенше жағдайлар вице-министрі, генерал-майор Марат Күлдіков те келді. Өрт аумағында командалық-штабтық машина жұмыс жасауда. ТЖМ және Абай облысы ТЖД жедел штабтарының дағдарыстық орталықтары құрылды. Тұрғындардың мүлкінің сақталуын қамтамасыз ету үшін ӨКМ жеке құрамының кезекшілігі ұйымдастырылды.
Өрт сөндірушілерге Абай облысы полиция департаментінің басшылығы мен жеке құрамы алғашқы сәттен бастап көмек көрсетуде. Болжам бойынша, өрт 1500 гектар аумақты шарпыған. Бородулиха ауданының полиция бөлімінің жеке құрамы да дабыл бойынша көтерілді. Сондай-ақ халықты құлақтандыру үшін және аумақты қарауылдау мақсатында полиция қызметкерлері әкімдік өкілдерімен бірлесіп өрт аймақтарына жақын орналасқан 3 елді мекенді аралауда.
Аудан орталығында 3 эвакуациялық пункт орналастырылған, сондай-ақ өрттен зардап шеккен азаматтарды жеткізу үшін ПАЗ маркалы 4 автобус берілді.
Өз тілшіміз
