Сейсенбі күні қала басшысы Айбек Кәрімовтің жетекшілік етуімен қалалық әкімдіктің кезекті отырысы өтті. Жиынға қала басшысының орынбасары Зәуреш Исабаева және бөлім басшылары мен өзге де мекемелердің басшылары, қала маңындағы ауылдық округтердің әкімдері қатысты.
Жиын барысында күн тәртібіндегі бірнеше мәселе қаралды. Алдымен Семей қалалық кәсіпкерлік бөлімінің басшысы Марат Нүгеров көліктік-логистикалық жүйенің жағдайы мен даму болашағы туралы баяндама жасады.
— Көліктік-логистикалық жүйенің құрылу мақсаты – облыс экономикасындағы көліктік шығынды төмендету және тиімді тауар қозғалысын қамтамасыз ететін қазіргі замандық көліктік-логистикалық инфрақұрылымды дамыту, Семей қаласы арқылы транзиттік тасымалдаудың дамуын ынталандыру, өңірдің көліктік жүйесін ҚР – ның көліктік-логистикалық жүйесімен біріктіру болып табылады, — деген М.Нүгеров, — халықаралық әуежайдың болуы, қала арқылы «Солтүстік» (Омбы – Павлодар – Семей – Жарма – Майқапшағай – және Омбы – Павлодар – Семей – Жарма – Аякөз – Таскескен – Үшарал – Сарыөзек) халықаралық автокөлік жолдарының құрамына кіретін бірнеше автомобиль маршруттарының өтуі жоба болашағының зор болуына себеп болып отыр, — деп атап өтті.
Сонымен қатар, Марат Нүгеров Семей қаласы арқылы Қытай – Қазақстан – Ресей бағыттарында үлкен транзиттік әлеуетке ие кеме арқылы тасымал Ертіс өзенінен өтетінін, сондай-ақ, Семей қаласының көліктік-логистикалық жүйесі тұрғындар саны 5 миллионнан астам адамнан тұратын, радиусы 750 шақырым Ресей және Қазақстан қалаларының ірі кәсіпорындары шоғырланатынын айтты.
— Көліктік-логистикалық орталық құрылысы қаланың шыға берісіндегі «Сары» базарының ауданындағы Алматы тас жолы бойында және Семей халықаралық әуежайы аумағында жоспарланып отыр, — деген кәсіпкерлік бөлімінің басшысы, — 40 гектарды құрайтын жер теліміне құқық орнатушы құжаттар және қажетті техникалық талаптар алынды. Қазіргі уақытта көліктік-логистикалық орталығы құрылысының бас жоспары мен сызбалық жобасын әзірлеу жұмыстары жүргізілуде, — деді өз сөзінде.
{jcomments on}Кәсіпкерлік бөлімі басшысынан кейін аталмыш мәселе бойынша сәулет және қала құрылысы бөлімінің басшысы Қалдыбек Қоқиланов сөз алды.
— Теміржол, автомобиль, су және әуе қатынастарының күре жолдарының қиылысында орналасқан Семей қаласы – ежелден бері бүгінгі күнге дейін халықаралық сауданың маңызды бөлігі болып келеді, — дей келе, — заманауи көлік және логистикалық инфрақұрылым облыс және қала экономикасында тиімді тауар айналымын және көлік шығындарын төмендетуді қамтамасыз ететін, ШҚО арқылы транзиттік тасымалдауды дамытуға себепші болатын, облыстың көлік жүйесін Қазақстан Республикасының көліктік-логистикалық жүйесіне интеграциялау көршілес шекаралас республикалармен, бірінші кезекте, Қытай мен Ресей тауар айналымын дамытуға мүмкіндік береді, — деді Қалдыбек Қоқиланов.
Қалалық жер қатынастары бөлімінің басшысы Құдайберген Сейілханов көліктік-логистикалық орталығын қала әуежайымен ұштастыру мақсатында 40 гектар жердің бөлінгенін тілге тиек етіп, жақында жер телімдерінің аукционға шығарылатынынан хабардар етті.
Жиында көліктік-логистикалық жүйенің жағдайы мен даму болашағы туралы мәселе талқыланып, қала әкімі бұл мәселе бойынша толықтай ақпаратқа қанық болған соң, «Қазақстан Республикасы көлік жүйесінің инфрақұрылымын дамытудың және ықпалдастырудың 2020 жылға дейінгі мемлекеттік бағдарламасы» ҚР Президентінің 2013 жылдың 13 қаңтарындағы № 725 Жарлығына сәйкес, жиынға қатысушылар бір ауыздан қолдау білдіріп, қала әкімдігі Қаулы қабылдады.
Сонымен қатар, жиын барысында қалалық жұмыспен қамту және әлеуметтік бағдарламалар бөлімі басшысының міндетін атқарушы Жанат Нүкішев ҚР Президентінің «Қазақстанның әлеуметтік модернизациясы: Жалпыға Ортақ Еңбек Қоғамына қарай жиырма қадам» бағдарламалық мақаласын іске асыру шеңберінде жұмыспен қамту және әлеуметтік қамтамасыз ету саласында жүргізіліп жатқан жұмыстар туралы баяндады. Жанат Нүкішевтің сөзіне сүйенсек, 2011 жылдан бастап аталмыш бағдарлама бойынша мемлекет бюджетінен арнайы қаржы бөлініп, 26 мыңнан аса адам тартылып, соның 16 мыңнан астамы тұрықты жұмысқа орналасқан. Мәселен, әлеуметтік жұмыс орындарына 3200-ге жуық, кәсіптік оқытуға 4300-ден астам, жастар тәжірибесі бойынша 3 мыңнан астам, ал қоғамдық жұмыстарға 4500-ден астам адам жолданған.
— Халықтың әлеуметтік тұрғыдан қорғалуға аса мұқтаж болып табылатын тобы – бұл жасына және біліктілігін жоғалтуына байланысты, яғни, 50 жастан асқан тұлғалар. Талдау жасалып отырған кезеңде осы санаттағы 2200-ге жуық адам өтініш жасап, соның 1963-і жұмыспен қамтудың белсенді түрлеріне қатысты. Ал оның 45,4 пайызы тұрақты жұмыс орындарына орналасты. Сол сияқты түзеу мекемелерінде жазасын өтеп шыққандардың қатарынан 115 адам өтініш жасаса, соның 46 пайызы тұрақты жұмыспен қамтылды, — деген Ж.Нүкішев, — аз қамтылған азаматтардың жұмыспен қамтудың белсенді түрлеріне қатысуын ынталандыру мақсатында ағымдағы жылы 3 облыста, атап айтсақ, Ақмола облысы, ШҚО және Жамбыл облысында «Өрлеу» пилоттық жобасын іске асыру басталды. Аталмыш жобаға жұмыспен қамтудың белсенді түрлеріне қатысуға ниетті, отбасының әр мүшесіне шаққандағы табысы ең төмен күнкөріс деңгейінің 60 пайыздан төмен азаматтардың қатысуға мүмкіндігі бар болса, Семей қаласынан 162 аз қамтылған азамат қатысты, — деп атап өтті.
Айбек Мүталапханұлы баяндамашыдан статистикалық мәліметтерге сәйкес, қалалық жұмыспен қамту және әлеуметтік бағдарламалар бөліміне жұмыспен қамтамасыз етілу мәселесі бойынша әлеуметтік жағынан аз қамтылған отбасылар тарапынан түсетін өтініштердің неліктен жыл сайын азайып келе жатқанын сұраған болатын. Қала басшысының сауалына Жанат Нығметұлы қаладағы аз қамтылған отбасылардың жағдайы жыл сайын жақсарып келе жатқандығынан мағлұмат берді.
Нұрдәулет КӘКІШЕВ, «Семей таңы»
