Тарихы өткен ғасырдың басынан бастау алатын, күллі Алаш жұртының бағына туған арыстарымыз негізін қалап кеткен «Семей таңы» газетіне биыл тоқсан бес жыл толмақ. Ата басылымның мерейтойын атап өту аясындағы шаралар жалғасын табуда. Соның бірі — осы аптаның сейсенбісі күні өткізілген газет ғимараты орналасқан Интернационал көшесіне көшет отырғызу рәсімі. Шараға «Семей таңы», «Вести Семей» газеттерінің ұжымдары қатысты. Оннан астам шетен ағашының көшеті егілді.
Көшет отырғызу сынды игілікті іс — адам бойындағы табиғатқа, қоршаған ортаға деген құрметпен қарайтын, оны бағалай білетін жасампаздық қасиетінен хабар беретіні белгілі. Әрі отырғызылған жас ағаш жылдар өте келе тамыр жайып, үлкен мәуелі тал болып жайқалған шағында, өсіп тұрған жеріне көрік сыйлап тұрары да анық.
Сонымен осы аптаның сейсенбісі күні Интернационал көшесімен жүріп өткен қала тұрғындары «Семей таңы» және «Вести Семей» газеттерінің қызметкерлері мен тілшілерінің білек сыбанып шетен ағашының жас өскіндерін бір сызықтың бойымен егіп жатқанының куәсі болды. Әлқисса, компьютердің пернетақтасын бір уақыт күрекке айырбастаған шығармашылық ұжым мүшелері іске бар ынтасымен кірісіп кетті. Мұндай жұмысты күнде істеп жүрмесе де, ептілік танытқан тілшілер мен қызметкерлер әп-сәтте жас ағашты егетін орындарды әзірлеп қойды.
— Бүгінгі шараның мән-маңызы зор деп түсінемін. Себебі, шара ғасырға жуық тарихы бар газеттің мерейтойын атап өту аясында жүзеге асырылып жатыр. Сондай-ақ, менің білуімде, баспананың іргетасының қалануы, ағаш егу – өте үлкен мәні бар рәсімдер. Әрі бұл көшеттер басылымның берекелі болашағының бейнесі іспеттес,-дейді бас редактордың орынбасары Флора Левина.
{jcomments on}Отырғызылған жас көшеттер «Семей таңы» газетінің тоқсан бес жылдығын атап өтудің белгісіне айналумен қатар, ата басылымның 100 жылдығын, одан да ары қарай тойланатын мерейлі мерекелердің куәсі болады деген үміт бар. Себебі, орташа есеппен алғанда шетеннің жасы 80-100 жылды құрайтын көрінеді. Жас тілшілер мен жас көшеттер бірге өсіп, қала мен халыққа қуаныш сыйлауға жазсын!
Мирас ҚҰСАЙЫН, «Семей таңы»
