Үстіміздегі жылдың 4 желтоқсанында 95 жасқа толғалы отырған, негізін Алаштың біртуар перзенттері қалаған «Сарыарқа» газетінен бастау алатын «Семей таңы» — өзінің ұзақ ғұмырында аймағымыздың өркендеуі жолындағы ізгілікті істердің жаршысы, мыңдаған оқырмандардың рухани серігі бола білген басылым болды. Ол өзінің осы қасиетті миссиясын бүгінгі тәуелсіз еліміз жағдайында да абыроймен атқаруда.
«Семей таңы» беттерінен жерлестеріміз қоғамдық өмірдің барлық саласына арналған мақалалармен және мәліметтермен қатар Отан тарихына қатысты небір қызықты деректерді оқып, рухани нәр алып келеді.
Тәуелсіздік алған 90-шы жылдардан бастап-ақ «Семей таңы» отандық тарихтың «ақтаңдақ» болып жатқан немесе ашылмаған беттерін халыққа жалықпай таныстыруда.
Кезінде оның беттерінде белгілі шежіреші, ұлтымыздың, оның ішінде өңіріміздің бай тарихы және әдеби мұрасын мол білген, марқұм әкем Қарпық Егізбаевтың да жұртшылық құмарта оқитын мақалалары да жиі басылатынын үлкен сезіммен еске аламын.
95 жасқа толғалы отырған сүйікті газетімізге және оның ұжымына шығармашылық табыстар тілей отыра, «Жасай бер, ізгіліктің жаршысы — «Семей таңы»! — дегім келеді.
Мұхтарбек КӘРІМОВ,
Семей қаласының Шәкәрім
атындағы мемлекеттік
университетінің М. Қозыбаев
атындағы тарихи зерттеулер ғылыми орталығының директоры.{jcomments on}
