Семейде ХІ-ші халықаралық «Ертіс әуендері» фестивалі өтті. Шара аясында алты концерт ұйымдастырылып, мыңнан астам өнерпаз қатысты. Сондай-ақ Невзоровтар отбасы атындағы облыстық бейнелеу өнерінің мұражайында қолөнер бұйымдарының көрмесі де өтті.
Орыс әлеуметтік — мәдени орталығы мен Невзоровтар отбасы атындағы Шығыс Қазақстан облыстық бейнелеу өнерінің мұражайы биыл халық шығармашылығының жаңа күзгі көрмесін ашты.
Көрмеге қатысушылардың арасында Семей, Өскемен қалаларынан және Шемонаиха ауданынан келген шеберлер, Семей қаласының Шәкәрім атындағы мемлекеттік университеті, «Семей» колледжінің, жастар мен балалар шығармашылығы сарайының өнерпаздары болды. Көрмені тамашалаған жұрттың назарына 300-ден астам жәдігер ұсынылды. Көрмеде әртүрлі әдістермен орындалған бұйымдар көрсетілді. Олардың ішінде декупаж, папье-маше техникасы, бұл пластикасы, тағы басқа техникалар бойынша жасалған, заттар бар. Сондай-ақ, көрмеге моншақтан тоқылған, газет қағазынан жасалған түтіктен тоқылған, бізбен және ілмекпен тоқылған жәдігерлер, қайыңның қабығына салынған суреттер, ағаштан, шыныдан және қыштан жасалған бұйымдар қойылды.
Биылғы көрменің ерекшелігі ретінде өте жоғары кәсіби шеберлікпен орындалған туындылар мен салт-дәстүрден хабар беретін жәдігерлердің көрсетілуін айтуға болады.
Қолданбалы өнер туындылары көрмесінен бөлек, өткен аптада фестиваль аясында арнайы концерттер ұйымдастырылды. Олардың қорытындысы бойынша Абай атындағы театрда гала-концерт өткізілді. Бұл шараның шымылдығын Семей қаласы әкімінің орынбасары Зәуреш Исабаева ашты.
— Бұл фестиваль қаламыздың, өңіріміздің мәдени өміріндегі үлкен шара. Фестивальге қатысушы семейліктер мен қала тұрғындарына дәтүрлі түрде өткізіліп келе жатқан ауқымды шараға қош келдіңіздер. Осы байқаудың дәл Семей жерінде ұйымдастырылып отырғаны атап өтуге тұрарлық жайт. 11 жыл қатарынан орыс әлеуметтік-мәдени орталығының ұжымы бізді концерттерімен қуантып келеді. Өз атымнан, қала әкімі Айбек Кәрімовтің атынан фестиваль қатысушыларына ризашылық білдіремін,-деді өз сөзінде Зәуреш Рамазанқызы.
{jcomments on}«Ертіс әуендері» дәстүрлі халықаралық фестиваліне биыл Қазақстан мен Ресейдің жиырма қаласы мен ауылдарының шығармашылық ұжымдары қатысты. Яғни, мыңнан астам өнерпаз бен сексеннен астам өнер ұжымы. Өзінің құттықтау сөзінде Семей қалалық орыс әлеуметтік-мәдени орталығы төрайымының міндетін атқарушы Надежда Козырева да қатысушыларға жақсы өнер көрсетулерін, алдағы уақытта жақсы деңгейде еңбек етулерін тіледі.
Фестивальге қатысуға Семей, Ақсу, Қапшағай, Өскемен, Бийск, Барнауыл, Кемерово және тағы да көптеген қалалардың ансамбльдері мен жеке орындаушылары өтініш білдірген. Байқауға Семейге танымал Валентин Шпак жетекшілік ететін Бийск қаласының «Сібір дауыстары» муниципалдық халықтық хор ұжымы, Анатолий Костюк басқаратын Өскемен қаласының «Орыс әні» халықтық хор ұжымы, Владимир Неведомыйдың жетекшілігіндегі Рубцовск қаласының «Алтайдың баурайында» халықтық хоры мен тағы да бірқатар өнер ұжымдары қатысты. Рубцовскі мен Семей қаласының әрқайсысының атынан қатысқан өнер ұжымдарының саны бесеу болды.
Бұл шараға семейлік танымал өнерпаздар да белсене қатысты. Атап айтқанда, «Айша Бибі» қазақ ансамблі, «Иртыш моңнары» татар ән мен би ансамблі, «Айнхайт» неміс ансамблі, жақында құрылған «Братцы» ансамблі мен «Исток» халықтық хоры. Сондай-ақ, Әміре Қашаубаев атындағы филармонияның «Славянка», «Эстера» вокалдық студиясы мен «Альфа данс» би тобы сияқты өнер ұжымдары қатысты.
Фестиваль қорытындысы бойынша «Би өнері», «Жас орындаушылар концерті», «Аспапты миниатюра», «Вокал жанры», «Хор жанры» сияқты аталымдар бойынша марапаттау рәсімі өтті. Үздіктер қатарына Ново-Алтайскінің «Коробейники» би ансамблі, Астана қалсының «Станичники» халықтық хоры мен Бийск қаласының «Сібір дауыстары» шығармашылығы бар. Сондай-ақ, отыздан астам өнер ұжымы ХI-ші дәстүрлі халықаралық «Ертіс әуендері» фестивалінің лауреаты атанды. Екі күн өткізілген байқаудың қорытындысы, міне, осындай болды.
Мирас ҚҰСАЙЫН, «Семей таңы»
