Жер — халықтың ырысы, сондықтан тиімді пайдаланылуы тиіс. Мемлекет басшысы Қасым-Жомарт Тоқаевтың тапсырмасымен пайдаланылмай жатқан және мақсатсыз пайдаланылып отырған жерлер мемлекет меншігіне қайтарылуда. Президент тапсырмасына орай, еліміздің әр өңірінде жер комиссиясы құрылып, аталған мәселе бойынша жұмыстар жүргізіліп жатыр. Жер қатынастары бөлімінің басшысы В.Калиновский Бесқарағай ауданы әкімдігінің отырысында осы бағытта атқарылған жұмыстар жайлы баяндады.
Әйгерім СӘРСЕНҚАЛИ,
«Semeı tańy»
— Мемлекет басшысының жерді тиімді игеру жөніндегі тапсырмасын іске асыру мақсатында Бесқарағай ауданында біршама жұмыстар еңсерілді. Шаруа және фермер қожалықтарының, заңды тұлғалардың жайылымдық жерлерді пайдалануына мониторинг жүргізілді. 543 жер пайдаланушы, яғни барлық жер пайдаланушылардың жерлері зерттелді. Тексеру нәтижесінде жайылымды пайдаланбаған немесе мал басы жүктемеден 20 пайызға кем 35 шаруашылықтың ауданы 33930,7 гектар болатын аумақты заңнамаға сәйкес пайдаланбай отырғаны анықталды. Бұл аумақ — ауыл шаруашылық маңыздағы жерлер санатында тұрған барлық жайылымдық жерлердің 9,4 пайызы.
Мониторинг жұмыстарынан соң жалпы ауданы 122,3 гектар болатын 3 жер телімі қайтарылды, оның 4,2 гектары — шабындық, 97,3 гектары — жайылымдық болса, 20,8 гектары — өзге де жерлер,- деп атап өтті В.Калиновский.
Бөлім басшысының айтуынша, Абай облысының жер ресурстарын басқару департаментіне тексеру жүргізу үшін 32 шаруашылық иелігіндегі жалпы ауданы 33 808,4 гектар болатын жер телімдері жайлы материалдар жіберілген. Биылғы жылдың 25 мамырындағы жағдай бойынша, департамент тарапынан 11 жер пайдаланушы тексерілген.
5739,4 гектар аумаққа иелік ететін «Бескаргай Агро», «JASA» ЖШС, «Коль», «Ауыл» «Толымхан» шаруа қожалықтары сынды 5 шаруашылықтың жер заңнамасы талаптарын бұзғандары анықталып, басшыларына ескерту берілді, 1 жыл мерзімде бұзушылықтарды жою туралы нұсқама берілді. Көрсетілген мерзімде жер мақсатына сай пайдаланылмаған жағдайда, жер телімдерін мәжбүрлеп иеліктен шығару туралы сотқа талап арыз жолданбақ. Сонымен бірге мемлекеттік кірістер басқармасына жер салығын 20 есе ұлғайту үшін материалдар жіберілді.
Дегенмен жер пайдаланушылардың көпшілігі мемлекет қазынасын ысырап қылып, жөн-жосықсыз игеріп отыр деуге де болмайды. Жер-ананы мақсатты пайдаланып, көл-көсір өнімін алып, төрт түлігін өрбітіп отырғандар да аз емес.
— 15396,1 гектар аумақтағы «Арбиев», «Шыгыс», «Салтанат», «Береке», «Шаңырақ-3», «Ержан» сынды алты шаруашылықты тексеру барысынды заң бұзушылық әрекеттері тіркелмеді. Қалған шаруашылықтардағы пайдаланылмай жатқан жерлерді анықтау үшін департамент тарапынан тексеру жүргізілетіні туралы ескерту хаттарды тапсыру үшін басшылардың тұрғылықты мекенжайлары анықталуда.
Егістік жерлердің ауданы 88 673 гектарды құрайды. Бұл жерлердің пайдаланылуы бекітілген кестеге сәйкес мамыр, маусым айларында тексеріледі. Бүгінгі күнге дейін Беген, Жетіжар және Қарабас ауылдық округтеріндегі ауылшаруашылық жерлері тексерілді. Қазіргі күні мәліметтер өңделу үстінде. Пайдаланылмай отырған жерлер бойынша материалдар департаментке жіберілетін болады. Пайдаланылмаған ауыл шаруашылығы маңызындағы жерлерді анықтау жұмыстары жалғасын табуда және тұрақты бақылауда тұр,- деді В.Калиновский.
