Жақында әлеуметтік желіде «СМЗ» АҚ зауыты қызметкерлеріне жалақының кешіктірілуіне қатысты бейнеролик тараған болатын. Аталған мәселе бойынша Абай облысы әкімі Нұрлан Ұранхаев шұғыл кеңес өткізіп, зауыт басшылығына нақты тапсырмалар берді.
Кеңеске облыс әкімінің орынбасары, облыс әкімі аппаратының басшысы, облыстың мемлекеттік кірістер департаментінің басшысы, облысты бақылау басқармасының өкілдері (ГАСК, еңбек инспекциясы), сондай-ақ «Oljakol» жауапкершілігі шектеулі серіктестігі өкілі Н.Омаров, «СМЗ» АҚ қызметкерлерінің өкілдері Т.Дерябина, Р.Миргород қатысты.
Жұмыс кеңесі барысында Нұрлан Ұранхаев кәсіпорын қызметкерлеріне, оның ішінде бұрын еңбек шарттары бұзылған қызметкерлерге де берешекті өтеуді жеделдетуді тапсырды.
Өңір басшысының тапсырмасы аясында «Oljakol» компаниясы кәсіпорын қызметкерлерінің өкілдерімен бірлесіп жалақы бойынша берешекті кезең-кезеңімен өтеу кестесін жасауы тиіс.
Осы мәселе бойынша 12 шілдеде қайта жұмыс кеңесі өтеді. Онда аймақ басшысы берген тапсырмалардың орындалуы қаралады және қолданыстағы заңнама шеңберінде тиісті шаралар қабылданатын болады.
Сондай-ақ жұмысшылардың арызына сәйкес еңбек инспекциясы «Семей машина жасау зауыты» АҚ-ға қатысты жоспардан тыс тексеру тағайындады.
Айта кету керек, «СМЗ» АҚ қазіргі уақытта бекітілген жоспарға сәйкес оңалту рәсімінен өтуде. Биыл 31 наурызында қиын жағдайға тап болған «Семей машина жасау зауыты» АҚ кредиторлар комитетімен «Oljakol» ЖШС зауыттың жаңа инвесторы ретінде таңдалды. Бүгінде серіктестік жұмысшылар алдындағы жалақы берешегін өтеу үшін барлық қажетті шараларды қабылдауда.
«Oljakol» ЖШС кредиторлардың талаптарын орындау және берешектерді өтеу міндеттемелерін өзіне қабылдайтыны туралы соттың тиісті шешімін күтті. Сот шешімі 2023 жылдың 29 маусымында шықты және жария етілгеннен кейін 10 жұмыс күні ішінде заңды күшіне енетінін атап өткен жөн.
«Семей машина жасау зауыты» АҚ-дағы жағдай тұрақты бақылауда екенін хабарлаймыз.
