Астана күні қарсаңында Жарма ауданының Қалбатау ауылында 20 пәтердің кілті салтанатты түрде табыс етілді. Шараға аудан әкімі Жарқынбек Байсабыров қатысып, көп балалы отбасылар мен әлеуметтік жағдайы төмен жандардың көптен күткен қуанышына ортақтасып, өз құттықтауын жеткізді.
А.ӘБІЛ,
«Semeı tańy»
— Еңселі елордамыздың 25 жылдық мерейлі мерейтойы қарсаңында сіздерге баспана кілтін тапсырып отырмыз. «Үйі жоқтың күйі жоқ» дейді. Мерекемен тұспа-тұс келген қоныс тойларыңыз құтты болсын! Шаңырақтарыңыз шаттыққа толы болып, береке-бірлігіміз арта берсін. Жаңа үйлер «Қуатты өңірлер – ел дамуының драйвері» ұлттық жобасы шеңберінде салынды. Қазір ауданымызда облыс басшысы Нұрлан Ұранхаевтың тікелей қолдауымен 30 пәтерлі 3 қабатты және екі пәтерлі 25 тұрғын үйдің құрылысы қарқынды жүргізілуде. Бұл жұмыс алдағы уақытта жалғасын табады,- деді аудан әкімі.
Жаңа баспанаға қол жеткізгендердің бірі — Нұржан Құсбековтің отбасы.
— Көп балалы отбасы ретінде екі жарым жылдай үй кезегінде тұрдық. Бүгін үш бөлмелі пәтерге қол жеткізіп, төбеміз көкке жеткендей қуанып жатқан жайымыз бар. Қалбатау ауылында 2016 жылдан бері тұрып жатырмыз. Содан бері алты пәтер ауыстырдық. Өте қуаныштымыз,- дейді Қалбатау ауылының тұрғыны Нұрбол Құсбеков.
Айта кетейік, Жарма ауданындағы тұрғын үйлердің құрылысы жеке инвестор есебінен салынуда.
— Қазіргі таңда ауданымызда жалпы аумағы 3375 шаршы метр болатын 25 екі пәтерлі тұрғын үй бой көтеруде. Бүгін, міне, Қалбатау ауылының Әуезов көшесінің бойында жалпы ауданы 1160 шаршы метр 8 екі пәтерлі баспананың құрылысы аяқталды. Пәтерлердің аумағы — 60 және 85 шаршы метр. Сондай-ақ аудан орталығындағы Искаков көшесінің бойында жалпы аумағы 1490 шаршы метр 12 екі пәтерлі, Шар қаласында жалпы ауданы 725 шаршы метр 5 екі пәтерлі тұрғын үйлердің құрылысы жүргізілуде. Инвестор — Динара Исабаева. Мердігер компания — «Жарма ҚұрылысГаз» ЖШС. Аталған үйлердің жалпы сатып алу құны 573,75 млн тенге. 1 шаршы метрдің құны — 170 мың тенге. Аталған баспаналар ағымдағы жылдың қыркүйек айында аяқталады деп жоспарлануда. Сонымен қатар Қалбатау ауылының Достық көшесінің бойында 30 пәтерлі 3 қабатты үйдің құрылысы басталды. Биылғы жылдың қазан айында пайдалануға беріледі деген жоспар бар,- дейді Жарма ауданының сәулет, қала құрылысы және құрылыс бөлімінің басшысы Бейбіт Мұхаметқали.
