Абай облысының әкімі Нұрлан Ұранхаев Семей қаласындағы бірқатар нысандарды аралап, жүргізіліп жатқан жұмыстардың барысымен танысты.
Облыс әкімі, ең алдымен, тұрғындардан санитарлық тазалығына қатысты жиі шағым түсетін Семей — Павлодар тас жолының бойындағы ескі бейітке барды. Тұрғындар қорымның тазалығына, қоршаудың жоқтығына байланысты бірнеше рет шағымданған болатын. Жалпы, бұл жер қала аумағында болғанымен, «Семей орманы» мекемесіне тиесілі. Естеріңізде болса, маусым айының ортасында бейіт басында болған аймақ басшысы үйілген қоқысты шығарып, аумақты тазалауды қалалық әкімдік пен «Семей орманы» МОТР ұжымына тапсырған болатын. Алайда әлі күнге дейін тазалық жұмыстары жүргізілмеген.
– 13 шілдеге дейін бәрін бітіреміз деп уәде бердіңіздер. Неге үлгермей жатырсыздар? Барлығын тазалау керек. «Семей орманы» басшылығына, Орман шаруашылығы және жануарлар дүниесі комитетіне хат жолдайтын боламыз. Бұлай болмайды. Семей қаласы әкімдігі де өздеріне тиесілі аумақтың барлығын тазалауы керек. Тез арада бұл мәселені шешу қажет, – деді облыс әкімі.
Аймақ басшысы осыдан соң орташа жөндеу жұмыстары жүріп жатқан Чайковский және Шугаев көшелеріне барды. Шугаев көшесінің жолына орташа жөндеу жұмыстары жүргізіліп, жол жиектері ауыстырылды және жаяу жүргіншілер жолдары қалпына келтірілді. Қазір бұл көше ашылып, көлік қозғалысы қалпына келтірілген. Ал жалпы ұзындығы 1,2 шақырым болатын Чайковский көшесіндегі жөндеу жұмыстары 8 тамызға дейін аяқталуы тиіс. Нұрлан Ұранхаев мердігер мекеме басшысына жұмысты белгіленген мерзімде әрі сапалы аяқтауды тапсырды.
– Мердігердің жұмыстарды келісімшартқа сәйкес жүргізуін, 1 сантиметрге болса да кеміп қалмауын қадағалаңыз. Әр бордюрдің биіктігіне дейін бақылаңыз,– деді Н.Ұранхаев.
Облыс әкімі сонымен қатар білім мекемелерін де аралады. Қаладағы алғашқы білім ордаларының бірі №43 орта мектепке барып, ондағы акт және спорт залының жөндеу жұмыстарының барысымен танысты. Мердігер компания басшысына жөндеу жұмыстарының аяқталуын оқушылар күтіп отырғанын, балалардың қауіпсіздігі бірінші орында екенін ескертіп, жұмыстарды сапалы әрі уақтылы аяқтауды тапсырды.
Нұрлан Тельманұлы Экономикалық лицейге, Ж.Үшкемпіров атындағы спорт мектебіне де барды.
«ST» — ақпарат
