Абай облысының әкімі Нұрлан Ұранхаев «Қазақ зағиптар қоғамы» қоғамдық бірлестігінің Семейдегі оқу-өндірістік кәсіпорнына барды.
Аймақ басшысы мекеменің тыныс-тіршілігімен, оның базасында орналасқан кітапхана жұмысымен танысып, бірлестік мүшелерінің мұң-мұқтажын тыңдады.
Бірлестіктің міндеті – мүмкіндігі шектеулі жандардың құқықтарын қорғау, ақпараттық-түсіндіру жұмыстарын жүргізу және жұмысқа орналасуға көмектесу. Бұл ұйымға 530 адам мүше. Олардың арасында көркемөнерпаздар, спортпен айналысатындар, паралимпиада және үстел ойындарының спортшылары да бар.
Мұндағы мамандандырылған кітапханада оқырмандар үшін барлық жағдай жасалған. Қолмен ұстап көру, есту жүйесі және көруі нашар жандарға арналған қызметтер қарастырылған.
Кәсіпорын демеушілердің көмегіне мұқтаж. Ғимарат күрделі жөндеу жұмыстарын қажет етіп тұр. Кейбір үй-жайлар жалға берілген, бірақ қажетті құрал-жабдықтарды сатып алуға, құбырларды жаңартуға және жөндеуге қаражат жетпейді.
«Сіздердің шағымдарыңыз ескеріледі. Кәс іпорынға демеушілер керек екені анық. Мәселелеріңізді қарастырып, бірлестік мүшелеріне қолайлы жағдай жасау және инфрақұрылымды жақсарту үшін жоспарымызды нақтылаймыз», – деді облыс әкімі Нұрлан Ұранхаев.
Кездесу соңында өңір басшысы кәсіпорынға алдағы уақытта тағы бір келіп, бірлестік мүшелерімен кездесу өткізуге уәде берді.
Абай облысының әкімдігі
