5 қазан күні облыс әкімі Нұрлан Ұранхаев пен Семей қаласының әкімі Нұрбол Нұрсағатов жергілікті БАҚ өкілдері үшін көшпелі баспасөз мәслихатын ұйымдастырып, тілшілер қауымымен бірге бірнеше нысанды аралап шықты.
Облыс әкімі Нұрлан Ұранхаев журналистер қауымын сол жағалаудағы ЖЭО-1-де қарсы алды. Бұл жылу электр орталығы 1934 жылы пайдалануға берілген. 2010-2019 жылдары мұндай қайта жөндеу жұмыстары жүргізілген. 564 коммерциялық, 30 әлеуметтік, 55 бюджеттік, 362 көпқабатты тұрғын үйге қызмет көрсетеді.
Жалпы бүгінгі күні қалада 1 ЖЭО, 21 қазандық, 76 орталық жылу пункті, 322,5 шақырым жылу желілері бар. «Теплокоммунэнерго» МКК кәсіпорнының негізгі жылу қуаттылығы сағатына 1067,01 Гкал болса, қазіргі қуаттылығы сағатына 880,82 Гкал. Оң жағалау бойынша жылу тапшылығы сағатына 125,82 Гкал-ды құраса, сол жағалау бойынша артықшылық 9,59 Гкал/сағ.
Қазіргі күні бюджет қаражаты есебінен 13, тарифтік смета аясында 22 жылу көзінде жөндеу жүргізілді. Сондай-ақ бірқатар нысандарда орталық жылу пункті мен кварталішілік, магистралдік желілер, жылу оқшаулағыштарды қалпына келтірілуде.
— ҚР Үкіметінің 2023 жылғы 31 қаңтардағы қаулысына сәйкес, Семей қаласындағы жылу көздері мен желілерінің құрылысына және қайта жөндеу жұмыстарына 26 жобаға 147 млрд. теңге қарастырылды. Жөндеу жұмыстары аясында жылу көздерінің тозу деңгейі 20 пайызға, жылу желілерінің тозу деңгейі 40 пайызға азайып, оң жағалаудағы жылу тапшылығы төмендеп, сағатына 164 Гкал-ға артады деп күтілуде. Қазір жылу маусымына дайындық 99,9 пайызды құрайды. Барлық жұмыстар аяқталуға жақын. Жөндеу жұмыстары жүргізілген аумақтардағы жолдар қалпына келтірілуде. Былтыр екі нысанда қалпына келтіру барысында ескі материалдар қолданылған. Біз тиісті тұлғаларға хат жазып, бұл мәселені көтердік. Келешекте бұндай мәселе қайталанбайды деп ойлаймын. Облыста көмір қоры жеткілікті. Барлық бюджетік ұйымдар 100 пайыз қамтылған. 15-20 мың тоннадай тұрмыстық көмір қоры бар,- деген аймақ басшысы Н.Ұранхаев жылу желілеріне жөндеу жұмыстары кеш басталғанын былай түсіндірді:
— Жылу желілеріне жөндеу жұмыстры мемлекеттік сатып алу байқауының қорытындысына байланысты басталды. Кейбір конкурстар әлі күнге ойнатылған жоқ. Бізде дайын жобалар болмады. Жобалар мамыр айында ғана аяқталды. Содан кейін ғана Үкіметке қаржы мәселесімен жүгіндік. 16,3 млрд теңге бөлінді,- деді аймақ басшысы.
2023 жылы алдағы жылыту маусымына дайындық аясында мердігер «ВостокМонтажИнжиниринг» ЖШС-мен ЖЭО-1-дегі №5 ыстық су қазандығын жөндеуге келісімшарт жасалған болатын.
Осыдан соң жұмыс тобы ЖЭО-1-ден П-1-ге дейінгі магистральді жылу желілері аумағындағы жөндеу жұмыстарының барысымен танысты.
Айта кетейік, Семей қаласындағы «Теплокоммунэнерго» МКК 2003 жылы 11 тамызда құрылған. Бүгінгі күні кәсіпорында 1226 адам, жылыту маусымында 1832 адам жұмыспен қамтылған. Олардың орташа жалақысы — 194 434 теңге.
